ڈونلڈ ٹرمپ نے صدارتی الیکشن میں کامیابی کے بعد اپنے نامزد کردہ نائب صدر جے ڈی وینس اور ان کی اہلیہ اوشا وینس کو بھی مبارک باد دی۔
امریکی نائب صدر جے ڈی وینس کی اہلیہ اوشا چلکوری کا تعلق بھارتی ریاست آندھرا پردیش کے ایک گاؤں وڈلورو سے ہے۔ ان کا خاندان 50 سال قبل بیرون ملک چلا گیا تھا۔
اوشا چلکوری کی پیدائش 1986 میں امریکا میں سان ڈیاگو کے ایک قصبے میں ہوئی تھی اور امریکا میں ہی پلی بڑھیں، تعلیم حاصل کیں۔
قانون کی تعلیم حاصل کرنے کے دوران اوشا کی ملاقات جے ڈی وینس سے ہوئی اور دونوں نے 2014 میں شادی کی۔ ان کے 3 بچے ہیں جن کی عمریں 6، 4 اور 2 سال ہیں۔
زمانہ طالب علمی میں دونوں طلبا رہنما کے طور پر متحرک رہے۔ قانون اور سیاست میں دلچسپی گہری دوستی اور پھر شادی کی وجہ بنی۔
تعلیم مکمل کرنے کے بعد اوشا نے قانون کی پریکٹس شروع کی۔ جے ڈی وینس بھی قانون اور علاقائی سیاست میں بھی متحرک ہوئے۔
جے ڈی وینس اس وقت ریپبلکن پارٹی کے سینیٹر بھی ہیں تاہم ٹرمپ کی فتح کے بعد وہ جنوری میں نائب صدر کا عہدہ سنبھالیں گے۔