16 نومبر سے پیٹرولیم مصنوعات 6 روپے فی لیٹرتک مہنگی ہونے کا امکان

16 نومبر سے ملک میں پیٹرولیم مصنوعات کی قیمتوں میں اضافے کا امکان ہے۔

انڈسٹری ذرائع کے مطابق عالمی مارکیٹ میں پیٹرولیم مصنوعات کی قیمتوں میں اتارچڑھاؤ کے باعث آئندہ 15 روز کے لیے پیٹرولیم مصنوعات 6 روپے فی لیٹرتک مہنگی ہونے کا امکان ہے۔ 16 نومبر سے پیٹرول کی قیمت ڈھائی روپے فی لیٹر تک بڑھ سکتی ہے۔

ذرائع کا مزید کہنا ہےکہ آئندہ 15 روز کیلئے ہائی اسپیڈ ڈیزل کی قیمت میں 5 روپے 91 پیسے فی لیٹر، مٹی کا تیل 5 روپے 54 پیسے فی لیٹراور لائٹ ڈیزل آئل کی قیمت میں بھی 5 روپے 90 پیسے تک اضافے کا امکان ہے۔ آئل کمپنیوں نے پیٹرولیم مصنوعات سے متعلق ورکنگ اوگرا کو بھجوا دی ہے۔

اوگرا قیمتوں سے متعلق ورکنگ 15 نومبر کو حکومت کو بھجوائے گا۔ وزیراعظم کی مشاورت سے قیمتوں سے متعلق حتمی منظوری ہوگی۔قیمتوں سے متعلق وزارت خزانہ نوٹیفکیشن 15 نومبر کو جاری کرے گی۔پیٹرولیم مصنوعات کی قیمتوں میں ردوبدل عالمی مارکیٹ کے تناسب سے ہوگا۔