سعودی عرب میں ہونے والی عرب اسلامی کانفرنس میں شرکت کے بعد ایران کے نائب صدر محمد رضا عارف نے ولی عہد محمد بن سلمان سے ملاقات کی۔
عرب میڈیا کے مطابق ایرانی نائب صدر نے سعودی دارالحکومت ریاض میں ولی عہد محمد بن سلمان سے ملاقات کی۔ دونوں رہنماؤں نے سفارتی تعلقات، اسرائیلی جارحیت اور مشرق وسطیٰ سمیت باہمی امور کی دلچسپی پر تبادلہ خیال کیا۔
ملاقات میں نائب صدر محمد رضا عارف نے ایران پر اسرائیلی جارحیت کی مذمت اور اسے اسلامی کانفرنس کے اعلامیہ میں شامل کرنے پر ولی عہد محمد بن سلمان کا شکریہ ادا کیا۔
ایرانی نائب صدر نے دوطرفہ تعلقات میں مزید مضبوطی پر زور دیتے ہوئے کہا کہ سعودی عرب کے ساتھ تعلقات دونوں ممالک اور خطے کے عوام کے لیے اہم اور ضروری ہیں۔
ولی عہد محمد بن سلمان نے دونوں ممالک کے درمیان تعلقات کی مضبوطی کے لیے اعلیٰ سطح کے رابطوں پر اتفاق کرتے ہوئے نائب صدر کی اسلامی کانفرنس میں شرکت پر شکریہ بھی ادا کیا۔
یاد رہے کہ سعودی عرب کی میزبانی میں ہونے والی عرب اسلامی سربراہی اجلاس میں اسرائیل کی غزہ، لبنان اور ایران پر جارحیت کی مذمت کرتے ہوئے عالمی برادری سے جنگ بندی میں کردار ادا کرنے کا مطالبہ کیا گیا تھا۔