بھارتی ریاست تلنگانہ کی حکومت نے معروف پنجابی گلوکار دلجیت دوسانجھ کے کانسرٹ کے حوالے سے نوٹس جاری کیا ہے۔
بھارتی میڈیا رپورٹس کے مطابق حیدرآباد میں رواں ہفتے دلجیت دوسانجھ کے کانسرٹ کا انعقاد متوقع ہے، جس کے لیے انتظامیہ کو حکومت کی جانب سے نوٹس کے زریعے ہدایات دی گئی ہیں۔
جاری کردہ نوٹس میں کہا گیا ہے کہ کانسرٹ کے دوران ایسے گانے نہ گائے جائیں جو شراب، منشیات یا تشدد کو فروغ دیتے ہوں۔
مزید برآں، اسٹیج پر بچوں کی شرکت پر پابندی عائد کی گئی ہے۔ بچوں کی حفاظت کے پیش نظر اونچی آوازوں اور فلیش لائٹس کے استعمال کو محدود رکھنے کی بھی ہدایت دی گئی ہے۔
یہ نوٹس گزشتہ ماہ نئی دہلی کے جواہر لال نہرو اسٹیڈیم میں ہونے والے دلجیت دوسانجھ کے کانسرٹ کے بعد جاری کیا گیا، جہاں گلوکار نے ’کیس‘، ’پنچتارا‘ اور ’پٹیالہ پیگ‘ جیسے گانے گائے تھے۔
اس کنسرٹ کے بعد چندی گڑھ کے بعض لوگوں نے الزام لگایا کہ ان گانوں میں شراب اور تشدد کو فروغ دیا گیا، جس پر مختلف حلقوں نے تشویش کا اظہار کیا تھا۔
تلنگانہ حکومت نے اس نوٹس کے ذریعے کنسرٹ انتظامیہ پر واضح کیا ہے کہ وہ قوانین کی پاسداری کریں اور عوامی تحفظ کو یقینی بنائیں اور قوانین کی خلاف ورزی پر سخت ایکشن لیا جائے گا۔