معروف فلم ساز ودھو ونود چوپڑا نے اپنی نئی فلم ’زیرو سے ری اسٹارٹ‘ کا ٹیزر جاری کردیا ہے۔
ٹیزر کا آغاز ایک سادہ سوال سے ہوتا ہے: "جب آپ نے پہلا خواب دیکھا تو کیا سوچا تھا؟" یہ سوال ہر دیکھنے والے کو ماضی کی یادوں اور بچپن کے خوابوں کی طرف لے جاتا ہے۔
’زیرو سے ری اسٹارٹ‘ چوپڑا کی پچھلی فلم ’بارہویں فیل‘ کا تسلسل ہے، اور اس کا مقصد زندگی میں نئے آغاز کا حوصلہ دینا ہے۔
فلم کے ذریعے یہ پیغام دیا گیا ہے کہ زندگی میں کبھی بھی اپنا خواب پورا کرنے کے لیے دیر نہیں ہوتی۔ اس کہانی میں مختلف شعبوں کے افراد کے ابتدائی خوابوں اور امیدوں کو پھر سے جوڑنے کی کوشش کی گئی ہے۔
ودھو ونود چوپڑا نے فلم کے بارے میں کہا، "ہم سب کی زندگی میں ایک 'زیرو' لمحہ ہوتا ہے، جب ہم نے پہلی بار خواب دیکھا تھا۔ یہ فلم اس لمحے کا جشن ہے اور یہ یاد دہانی بھی کہ نئے آغاز کے لیے کبھی دیر نہیں ہوتی۔" فلم کی ریلیز کی تاریخ 13 دسمبر 2024 مقرر کی گئی ہے۔