مشہور پاکستانی اداکارہ اور میزبان مشی خان نے حال ہی میں سوشل میڈیا پر وائرل ہونے والی نجی ویڈیوز لیک ہونے کے رجحان پر اپنے خیالات کا اظہار کیا ہے۔
مشی خان نے سوشل میڈیا پر اپنا ویڈیو بیان شیئر کیا ہے جس میں انہوں نے غیر اخلاقی یا نجی ویڈیوز لیک ہونے کے اس رجحان کو ’تشویشناک‘ قرار دیا۔
مشی خان نے اپنے بیان میں کہا ’یہ بہت افسوسناک ہے کہ نجی ویڈیوز لیک کرنے کا رجحان بڑھتا جا رہا ہے۔ یہ عمل کرنے والے لوگ اللہ کے عذاب سے نہیں بچ سکیں گے۔ میں تمام لڑکیوں سے اپیل کرتی ہوں کہ وہ اپنی ذاتی تصاویر اور ویڈیوز کسی کے ساتھ شیئر نہ کریں، چاہے وہ ان کا منگیتر ہی کیوں نہ ہو۔ لڑکیاں ایسی حرکتیں کر کے بلیک میلنگ کا شکار ہو جاتی ہیں، اور کئی بار خودکشی کی کوشش کرتی ہیں‘۔
انہوں نے مزید کہا کہ حالیہ واقعات میں گلگت بلتستان کی ایک لڑکی اور دیگر متاثرہ افراد کی مثالیں موجود ہیں جنہیں سوشل میڈیا پر بھی ٹرولنگ کا سامنا کرنا پڑا۔
مداحوں کی جانب سے مشی خان کے اس بیان پر ملے جلے ردعمل سامنے آرہے ہیں، کچھ مداحوں نے ان کی بات کی تائید کی جبکہ دیگر نے لڑکیوں کو محتاط رہنے کا مشورہ دیا۔
یاد رہے کہ ان دنوں سوشل میڈیا پر کئی معروف شخصیات کی ویڈیوز وائرل ہوچکی ہیں جن میں متھیرا، ٹک ٹاک اسٹار مناہل ملک اور اب امشا رحمان کی نجی ویڈیوز لیک ہوئی ہیں۔