نگر سے گلگت جانے والی وین کھائی میں گرگئی، ایک شخص جاں بحق

نگر سے گلگت جانے والی ٹویوٹا ہائی ایس کھائی میں گرنے سے ایک شخص جاں بحق ہوگیا۔

ریسکیو ڈبل ون ڈبل ٹو کے مطابق مسافر وین کو حادثہ ناصرآباد پولیس چیک پوسٹ کے قریب پیش آیا جہاں ڈرائیور تیز رفتاری کے باعث گاڑی پر قابو نہ رکھ سکا اور وین قلابازیاں لگاتی گہری کھائی میں جا گری۔

ہائی ایس میں کل 18 افراد سوار تھے جن میں سے ایک شخص موقع پر دم توڑ گیا جبکہ خواتین اور بچوں سمیت 12 افراد زخمی ہوئے جنہیں مقامی پولیس، ریسکیو اہلکاروں اور علاقہ مکینوں نے نکال کر ریسکیو اور محکمہ صحت کی ایمبولینسوں کے ذریعے سکندرآباد اسپتال منتقل کیا۔

ترجمان ریسکیو ڈبل ون ڈبل ٹو کے مطابق شدید زخمیوں کو گلگت منتقل کیا جا رہا ہے۔