کوہاٹ: خیبرپختونخوا کے ضلع کوہاٹ کے علاقے ڈھوڈہ شریف میں نامعلوم افراد نے فائرنگ کر کے پولیس اہلکار کو شہید کردیا۔
ایکسپریس نیوز کے مطابق ڈھوڈہ شریف میں ڈیوٹی پر مامور پولیس اہلکار پر نامعلوم افراد نے اندھا دھند فائرنگ کی اور پھر موقع سے فرار ہوگئے۔
واقعے کے بعد پولیس کی نفری موقع پر پہنچی جہاں مقتول کی شناخت محمد حسین کے نام سے ہوئی جو ڈسٹرکٹ جیل میں تعینات تھا۔
عینی شاہدین نے پولیس کو بتایا کہ واردات کے بعد ملزمان فرار ہوگئے جبکہ پولیس نے مقتول کی لاش کو ضابطے کی کارروائی کیلیے ڈی ایچ کیو اسپتال منتقل کردیا۔
تفتیشی ٹیم نے موقع سے شواہد اکھٹے کیے اور تھانہ بلی ٹنگ کی پولیس نے ملزمان کی تلاش کیلیے اطراف میں سرچ آپریشن اور داخلی و خارجی راستوں پر نگرانی سخت کردی۔