روحانی دوست

 صائم المصطفے صائم 
واٹس اپ (0333-8818706)
فیس بک (Saim Almustafa Saim)

علمِ الاعداد سے نمبر معلوم کرنے کا طریقہ:
دو طریقے ہیں اور دونوں طریقوں کے نمبر اہم ہیں۔
اول تاریخ پیدائش دوم نام سے!
اول طریقہ تاریخ پیدائش:
مثلاً احسن کی تاریخ پیدائش 12۔7۔1990 ہے۔
 ان تمام اعداد کو مفرد کیجیے، یعنی باہم جمع کیجیے:
1+2+7+1+9+9=29
29 کو بھی باہم جمع کریں (2+9) تو جواب 11 آئے گا۔
11 کو مزید باہم جمع کریں (1+1)
تو جواب 2 آیا یعنی اس وقت تک اعداد کو باہم جمع کرنا ہے جب تک حاصل شدہ عدد مفرد نہ نکل آئے۔ پس یعنی آپ کا لائف پاتھ عدد/نمبر ہے۔ 
گویا تاریخ پیدائش سے احسن کا نمبر 2 نکلا۔
اور طریقہ دوم میں:
سائل، سائل کی والدہ، اور سائل کے والد ان کے ناموں کے اعداد کو مفرد کیجیے
مثلاً نام ''احسن '' والدہ کا نام '' شمسہ'' والد کا نام '' راشد۔''
حروفِ ابجد کے نمبرز کی ترتیب یوں ہے:
1 کے حروف (ا،ء ،ی،ق،غ)  ، 2 کے حروف (ب،ک،ر)  ،  3 کے حروف (ج،ل،ش) ، 4 کے حروف (د،م،ت)  ،  5 کے حروف(ہ،ن،ث)  ، 6 کے حروف (و،س،خ) ، 7 کے حروف (ز،ع،ذ)  ، 8 کے حروف (ح،ف،ض)  ، 9 کے حروف (ط،ص،ظ) ، احسن کے نمبر (1،8،6،5)
 تمام نمبروں کو مفرد کردیں:(1+8+6+5=20=2+0= 2 ) 
گویا احسن کا نمبر2 ہے۔ایسے ہی احسن کی والدہ ''شمسہ'' کا نمبر9 اور والد راشد کا نمبر1 بنتا ہے۔
اب ان تینوں نمبروں کا مفرد کرنے پر ہمیں احسن کا ایکٹیو یا لائف پاتھ نمبر مل جائے گا:
(2+9+1=12=1+2=3)  
گویا علم جفر کے حساب سے احسن کے نام کا نمبر 3 نکلا!

علم الاعداد کی روشنی میں آپ کا یہ ہفتہ
پیر18تا24 نومبر 2024
پیر 18 نومبر 2024

آج کا حاکم عدد 3 ہے۔ آپ جس بھی شعبے سے منسلک ہیں آگے بڑھنے کے وسائل ضرور ملیں گے، کسی صوفی مزاج شخصیت سے ملاقات بھی ہوسکتی ہے اور یہ شخصیت استاد یا گرو بھی ہوسکتا ہے۔  علم الاعداد اور ہم آپ کی تاریخ پیدائش میں اگر 2،3،4،7،8 اور9 خصوصاً 3کا عدد یا پیدائش کا دن جمعرات ہے یا نام کا پہلا حرف ج،ل یا ش ہے تو آج کا دن آپ کے لیے بہتر دن ہوسکتا ہے۔  لیکن اگر آپ کی تاریخ پیدائش میں 1،5 اور6 خصوصاً 5 کا عدد یا پیدائش کا دن بدھ ہے یا نام کا پہلا حرف ہ،ن یا ث ہے تو آپ کے لیے اہم اور کچھ مشکل بھی ہوسکتا ہے۔

آج کا صدقہ: کسی کی غلطی معاف کرنا بھی صدقہ ہے۔ 20 یا 200 روپے، سفید رنگ کی چیزیں، کپڑا، دودھ، دہی، چینی یا سوجی کسی بیوہ یا غریب خاتون کو بطورِصدقہ دینا ایک بہتر عمل ہوگا۔ آج کا وردِخاص،’’یارحیم، یارحمٰن، یااللّہ‘‘ 11 بار، اول وآخر ایک بار درودشریف پڑھنا بہتر ہوگا۔ اسے کم از کم 11 بار لکھیں پھر اثرات ملاحظہ کیجیے!

منگل 19 نومبر 2024

آج کا حاکم عدد 2 ہے۔ منگل اور 2 کا عدد ایسی توانائی لاسکتا ہے، جس کی بنیاد جذبات ہوں دل کی جائز ناجائز خواہشات ہوں یہاں اکثر مثبت بھی منفی ہوجاتا ہے دل کا زیادہ کہا نہ مانیں۔ اگر آپ کی تاریخ پیدائش میں 1،3،4،5،8 اور 9 خصوصاً 4 کا عدد ہے یا آپ کی پیدائش کا دن اتوار ہے یا نام کا پہلا حرف د،م یا ت ہے تو آپ کے لیے آج کا دن کافی حد تک بہتری لائے گا۔ لیکن اگر آپ کی تاریخ پیدائش میں 2،6 اور7 خصوصاً 6 یا پیدائش کا دن جمعہ ہے یا نام کا پہلا حرف و،س یا خ ہے تو آپ کے لیے کچھ مشکل ہوسکتی ہے۔

آج کا صدقہ: صبروتحمل کو مضبوطی سے تھامیں، آپ کی آزمائش کا دن ہے۔ غصہ پی جائیں، یہ بہترین صدقہ اور تدبیر ہے۔ 90 یا 900 روپے، سرخ رنگ کی چیزیں ٹماٹر، کپڑا، گوشت یا سبزی کسی معذور سیکیوریٹی سے منسلک فرد یا اس کی فیملی کو دینا بہتر عمل ہوگا۔ آج کا وردِخاص،’’یاغفار، یاستار، استغفراللّہ العظیم‘‘ 13 بار اول وآخر1 بار درودشریف پڑھنا بہتر ہوگا۔ اسے 13 بار لکھنے سے نتائج سوفی صد آپ کے حق میں ہوں گے!

بدھ 20 نومبر 2024

آج کا حاکم عدد 8 ہے۔ اگر آپ زمین اور تعمیر کے کسی شعبے سے منسلک ہیں تو آج بہتر دن ہوسکتا ہے، لیکن یہاں کچھ کہنے سننے میں غلطی ہوسکتی ہے۔ معاہدہ کرتے ہوئے تمام جُزیات پر نظرثانی ضرور کرلیں کوئی غلطی ہوسکتی ہے۔ 2،3،4،6،7 اور8 خصوصاً 7 کا عدد یا پیدائش کا دن پیر ہے یا نام کا پہلا حرف ز،ع یا ذ ہے تو آپ کے لیے آج دن کافی بہتر ہوسکتا ہے۔ لیکن اگر آپ کی تاریخ پیدائش میں 1،5 اور9 خصوصاً 9 یا پیدائش کا دن منگل یا نام کا پہلا حرف ص، ط یا ظ ہے تو کچھ معاملات میں رکاوٹ اور پریشانی کا اندیشہ ہے۔

آج کا صدقہ: ہوسکتا ہے کوئی آپ سے اپنی غلطی پر معذرت خواہ ہو۔ ایسا ہے تو درگزر سے کام لینا بھی صدقہ ہے۔ زرد رنگ کی چیزیں یا 50 یا 500 روپے کسی مستحق طالب علم یا تیسری جنس کو دینا بہتر ہے، تایا، چچا، پھوپھی کی خدمت بھی صدقہ ہے۔ آج کا وردِخاص،’’یاخبیرُیا، وکیلُ، یااللّہ‘‘ 5 بار اول و آخر 1 بار درود شریف پڑھنا مناسب عمل ہوگا ان اسمائے الٰہیہ کو 5 بار لکھنا آپ کے لیے سعادتوں کے دروازے سوفی صد کھول دے گا۔

جمعرات 21 نومبر 2024

آج کا حاکم عدد 7 ہے۔ حالات جیسا رنگ دکھائیں اسی میں ڈھل جائیں۔ اسی کو قبول کریں۔ اپنی سمجھ کو آج کے لیے مشقت میں نہ ڈالیں، یہی بہتر حل ہے۔ خوش بختی حیران کرسکتی ہے۔ ایسا کوئی مسئلہ جو حل جو بظاہر حل ہونا ممکن نہیں حل ہوسکتا ہے۔ اگر آپ کی تاریخ پیدائش میں 3،4،5،7،8 اور9 خصوصاً 8کا عدد یا پیدائش کا دن ہفتہ ہے یا نام کا پہلا حرف ح، ف یا ض ہے تو آپ کے لیے بہتر دن ہے۔ لیکن اگر آپ کی تاریخ پیدائش میں 1،2 اور6 خصوصاً 1کا عدد یا پیدائش کا دن اتوار ہے یا نام کا پہلا حرف ا، ی یا غ ہے تو اندیشہ ہے کہ کچھ امور میں آپ کو مشکل ہوسکتی ہے۔

آج کا صدقہ،’’میٹھی چیز، 30 یا 300 روپے کسی مستحق نیک شخص کو دینا بہتر عمل ہوسکتا ہے۔ مسجد کے پیش امام کی خدمت بھی احسن صدقہ ہے۔ آج کا وردِخاص، سورۂ فاتحہ کی تین بار تلاوت یا ’’یا قدوس، یا وھابُ، یااللّہ‘‘ 3 بار اول و آخر 1 بار درودشریف پڑھنا بہتر عمل ہوگا۔ اللّہ ان پاک ناموں کو تین بار لکھیں! 

جمعہ 22 نومبر 2024

آج کا حاکم عدد 2 ہے۔ مادی وسائل کے حصول کے لیے بھاگ دوڑ نتیجہ خیز ہونے کی امید ہے۔ چھوٹے موٹے نشیب وفراز سے گزرنا پڑسکتا ہے، یہ زندگی کا حسن ہے، پریشان نہ ہوں۔ اگر آپ کی تاریخ پیدائش میں 1،3،4،5،8 اور9 خصوصاً 4 کا عدد یا پیدائش کا دن اتوار ہے یا نام کا پہلا حرف د، م یا ت ہے تو آپ کے لیے بہتری کی امید ہے۔ لیکن اگر آپ کی تاریخ پیدائش 2،6 اور7 کا عدد خصوصاً 2 یا پیدائشی دن پیر یا جن کے نام کا پہلا حرف ب، ک یا ر ہے تو آپ کو محتاط رہنے کا مشورہ ہے۔

آج کا صدقہ: کسی سے میٹھے بول اور نرم لہجہ بھی صدقہ ہے۔ 60 یا 600 روپے یا 600 گرام یا 6 کلو چینی، سوجی یا کوئی جنس کسی بیوہ کو دینا بہترین عمل ہوسکتا ہے۔ آج کا وردِخاص،’’سورۂ کہف ایک بار اور ’’یاودود، یامعید، یااللّہ‘‘ 11 بار ورد کرنا بہتر ہوگا۔ اول و آخر ایک بار درود شریف لازم پڑھ لیں ان اسمائے الہی کو تین بار لکھیں۔

ہفتہ 23نومبر 2024

آج کا حاکم عدد 5 ہے۔ جو معاہدے ہوچکے ہیں اور ان کے عملی طور پر مکمل ہونے کا وقت آگیا ہے تو اس میں خرابی کا اندیشہ ہے لیکن اگر آپ کوئی نیا معاہدہ کرنا چاہ رہے ہیں تو تمام اچھے اور خراب پہلو ضرور نظر میں رکھیں۔ اگر آپ کی تاریخ پیدائش میں 1،2،5،6،7 اور9 خصوصاً 1 کا عدد یا پیدائشی دن اتوار یا نام کا پہلا حرف ا، ی یاغ ہے تو آپ کے لئے ایک اچھا دن ہوسکتا ہے۔ لیکن اگر آپ کی تاریخ پیدائش میں 3،4 اور8 خصوصاً 4 کا عدد یا پیدائشی دن اتوار یا نام کا پہلا حرف د،م یا ت ہے تو آپ کو محتاط رہنے کا مشورہ ہے۔

آج کا صدقہ: صبر اور خاموشی بہترین تدبیر ہے لمبے عرصے کی منصوبہ بندی کے لیے سازگار وقت ہے۔  80 یا 800 روپے یا کالے رنگ کی چیزیں کالے چنے، کالے رنگ کے کپڑے سرسوں کے تیل کے پراٹھے کسی معذوریا عمر رسیدہ مستحق فرد کو دینا بہتر عمل ہوسکتا ہے۔ آج کا وردِخاص، کمی رزق کی ہو، سکون کی ہو یا راحتوں کی ہو، اس ورد خاص کو اپنالیں ان شاء اللّہ بند دروزاے کھل جائیں گے، ’’یافتاح، یاوھابُ، یارزاق، یااللّہ‘‘ 8 بار اول و آخر 1 بار درودشریف کا ورد بہتر عمل ہوگا تین لکھنا اس کے فوائد کو کئی گنا بڑھادے گا۔

اتوار 24 نومبر 2024

آج کا حاکم عدد 8 ہے۔ حکم راں طبقہ یا انتظامی افراد کے لیے کوئی الجھن موجود ہے، کوئی ایسا شخص کہ جسے آپ بالکل قدر کی نگاہ سے نہیں دیکھتے وہ حسد کی وجہ سے مخالفت پر اتر سکتا ہے۔ اگر آپ کی تاریخ پیدائش میں 2،3،4،6،7اور8 خصوصاً 7 کا عدد یا جن کا پیدائشی دن پیر ہے یا نام کا پہلا ع، ز یا ذ ہے تو آپ کے لئے ایک اچھے دن کی امید ہے۔ لیکن اگر آپ کی تاریخ پیدائش میں 1،5 اور9 خصوصاً 5 عدد یا جن کا پیدائشی دن بدھ ہے یا نام کا پہلا حرف ہ، ن یا ث ہے تو  آپ کے لیے کچھ مشکل ہوسکتی ہے۔

آج کا صدقہ، 13 یا 100روپے یا سنہری رنگ کی چیزیں گندم، پھل، کپڑے، کتابیں یا کسی باپ کی عمر کے فرد کی خدمت کرنا بہتر ہوگا۔ آج کا وردِخاص،’’یاحی، یاقیوم، یااللّہ‘‘ 13بار اول و آخر 1بار درودشریف پڑھنا مناسب عمل ہوگا۔ اسے 13 بار لکھنا بہتر ہوگا۔