کراچی؛ سرجانی ٹاؤن میں گھر کی چھت گرنے سے ماں جاں بحق ، 3 بچے زخمی

سرجانی ٹاؤن کے علاقے عرب گڈو گوٹھ گلی نمبر 9 میں گھر کی چھت گرنے سے ماں جاں بحق جبکہ 3 کمسن بچے زخمی ہوگئے۔

واقعہ کی اطلاع ملتے ہی اہل محلہ، چھیپا اور ایدھی کے رضا کار موقع پر پہنچ گئے اور متوفیہ کی لاش و زخمی بچوں کو عباسی شہید اسپتال منتقل کر دیا۔

ریسکیو حکام کا کہنا ہے کہ متوفیہ کی شناخت 30 سالہ زینب زوجہ حسن کے نام سے کی گئی جبکہ چھت گرنے سے ملبے تلے دب کر 3 بچوں کی شناخت 2 بیٹے ایک سالہ ازان ، 5 سالہ اویس اور 3 سالہ بیٹی عنایہ کے نام سے کی گئی جس میں بیٹی کی حالت تشویشناک بتائی جاتی ہے۔

ایس یچ او سرجانی ٹاؤن غلام حسین پیرزادہ نے بتایا کہ گرنے والی چھت پری کاسٹ کے سلب کی بنی ہوئی تھی جس کے اوپر تعمیراتی کام کے سلسلے میں بلاک رکھے گئے تھے جس کی وجہ سے چھت ان کا وزن برداشت نہ کر سکی اور گر گئی۔

تاہم پولیس اس واقعہ کے حوالے سے مزید معلومات حاصل کر رہی ہے۔