انتخابات میں مسلم مخالف مہم بند کی جائے؛ الیکشن کمیشن کا مودی کی جماعت کو حکم

بھارتی ریاست جھاڑکھنڈ میں ہونے والے عام انتخابات کے دوران مودی کی جماعت بھارتیہ جنتا پارٹی کے شرانگیز مذموم مقاصد کو الیکشن کمیشن نے ناکام بنادیا۔  

بھارتی میڈیا کے مطابق بھارتی الیکشن کمیشن نے انتخابات کے دوران مسلمانوں کے خلاف منفی پروپیگنڈا اور نفرت آمیز مہم چلانے پر بی جے پی کو نوٹس جاری کردیا۔

الیکشن کمیشن نے حکمراں جماعت بھارتیہ جنتا پارٹی سے وضاحت طلب کرتے ہوئے مسلم مخالف بینرز کو ہٹانے اور نعروں کو مٹانے کا حکم بھی دیا ہے۔

بھارتی الیکشن کمیشن نے سوشل میڈیا پلیٹ فارمز سمیت تمام ویب سائٹس سے بھی انتخابی مہم کے سلسلے میں مسلمانوں کیخلاف منفی اور شرانگیز مواد ہٹانے کا حکم بھی دیا۔

الیکشن کمیشن کا کہنا تھا کہ کسی بھی مذہب، نسل، طبقے اور فرقہ کے خلاف نفرت آمیز مہم چلانا انتخابی ضابطہ اخلاق کی سنگین خلاف ورزی ہے۔ 

واضح رہے کہ جھاڑکھنڈ میں ریاستی انتخابات کا دوسرا مرحلہ آج سے شروع ہو رہا ہے جس کے نتائج کا اعلان 23 نومبر کو کیا جائے گا۔