کراچی:
پاکستان کی 18 رکنی جونیئر ہاکی ٹیم ایشین جونیئر کپ ہاکی ٹورنامنٹ میں شرکت کے لیے عمان کے شہر مقسط روآنہ ہوگئی۔
عمان کے دارالحکومت مسقط میں 26 نومبرسے 4 دسمبر 2024 تک شیڈول 10 ٹیموں کے ایونٹ کوعالمی جونیئر کپ ہاکی ٹورنامنٹ کے کوالیفائنگ راونڈ کی حیثیت حاصل ہے، پہلی 6 پوزیشن پانے والی ٹیمیں ایف آئی ایف کے تحت اگلے برس ہونے والے عالمی جونیئر کپ میں شرکت کی حامل ہوں گی۔
ایشین جونیئرکپ کے لیے قومی جونیئر اسکواڈ کی قیادت عبدالحنان کر رہے ہیں، انٹرنیشنل ہاکی فیڈریشن کا رائزنگ اسٹار ایوارڈ جیتنے والے پہلے پاکستانی کھلاڑی سفیان خان نائب کپتان ہیں۔
قومی جونیئر ہاکی اسکواڈ فیضان جنجوعہ، علی رضا( گول کیپرز)، سفیان خان، عقیل احمد، بلال اسلم، ندیم خان، محمد زین، وسیم، سمیع(ڈیفینڈرز)، ذکریا حیات، محمد احمد مدی، عبدالحنان شاہدِ(مڈ ڈیفینڈر)، مغیرہ، رانا ولید، حمزہ فیاض، بشارت، قیوم ڈوگر اور سیف اللہ( فارورڈز) پر مشتمل ہے۔
اولمپئین قمرابراہیم ہیڈ کوچ، اولمپئین کامران اشرف کوچ، اجمل خان منیجر اور ابوذر ویڈواینالسٹ ہیں۔
ایشین جونئیرکپ میں شریک 10 ٹیموں کو دوگروپس میں تقسیم کیا گیا ہے، گروپ اے دفاعی چیمپئین بھارت، جاپان، جنوبی کوریا، تھائی لینڈ اور چائینیز تائپے پر مشتمل ہے۔
گروپ بی میں پاکستان، بنگلا دیشں، چین، ملائشیا اور میزبان عمان کی ٹیمیں شامل ہیں۔
پاکستان اپنا پہلا گروپ میچ 27 نومبر کو چین کے خلاف کھیلے گا، اگلے روز دوسرے میچ میں بنگلا دیشں سے مقابلہ ہوگا، 30 نومبرکو قومی جونیئر ٹیم اپنے تیسرے میچ میں ملائشیا سے مقابلہ کرے گی۔
واضح رہے کہ پاکستان نے 1988 میں کراچی میں ہونے والا پہلا ایشین جونیئرکپ جیتنے کے بعد 1992 اور پھر 1996 میں منعقدہ ایونٹ جیت کر مسلسل تین مرتبہ ٹائٹل اپنے نام کیا تھا، پاکستان مجموعی طور پر7 مرتبہ ایشین جونیئر کپ کا فائنل کھیل چکا ہے۔