پی ٹی آئی احتجاج میں گرفتار دو خواتین کو شناخت پریڈ پر جیل بھیجنے کا فیصلہ معطل

اسلام آباد ہائی کورٹ نے پی ٹی آئی احتجاج کے دوران گرفتار دو خواتین کو شناخت پریڈ پر جیل بھیجنے کا فیصلہ معطل کردیا۔

ایکسپریس نیوز کے مطابق اسلام آباد ہائیکورٹ کے جسٹس طارق محمود جہانگیری اور جسٹس بابر ستار نے درخواست پر احکامات جاری کیے۔

پی ٹی آئی کی دو خواتین روبینہ غفور اور شہناز ملک کو انسداد دہشت گردی عدالت نے پانچ روز کے لیے شناخت پریڈ پر جیل بھیجا تھا، پی ٹی آئی کے وکیل انصر کیانی نے شناخت پریڈ کا فیصلہ اسلام آباد ہائیکورٹ میں چیلنج کیا تھا۔

وکیل انصر کیانی نے کہا کہ اسی مقدمہ میں 9 خواتین گرفتار ہوئی اور شناخت پریڈ نہیں کرائی گئی،دونوں خواتین مقدمہ میں نامزد بھی نہیں اور نہ ہی پولیس کے پاس کوئی شواہد موجود ہیں، دونوں خواتین کی شناخت پریڈ کا فیصلہ کالعدم قرار دیکر رہا کیا جائے۔

عدالت نے دونوں خواتین کو رہا کرنے کا حکم دیتے ہوئے ایس ایچ او کو نوٹس جاری کر دیا اور ہدایت دی کہ 26 نومبر کو دونوں خواتین عدالت میں پیش ہوں اور ایس ایچ او کوہسار ریکارڈ سمیت عدالت پیش ہوں۔