کراچی؛ ملیر میمن گوٹھ میں جھگڑے کے دوران تیز دھار آلے کے وار سے ایک شخص ہلاک

ملیر میمن گوٹھ کے علاقے سموں گوٹھ فٹبال گراؤنڈ کے قریب تیز دھار آلے کے وار سے ایک شخص ہلاک ہوگیا جس کی لاش ضابطے کی کارروائی کے لیے جناح اسپتال لائی گئی۔

 ایس ایچ او میمن گوٹھ طاہر قادری کے مطابق مقتول کی شناخت 45 سالہ علی اکبر کے نام سے کی گئی جبکہ ابتدائی تفتیش کے دوران واقعہ دیرینہ دشمنی کا شاخسانہ معلوم ہوتا ہے ، مقتول سموں گوٹھ کا رہائشی تھا جو کہ تعمیراتی شعبے سے وابستہ اور اسٹیٹ ایجنٹ بھی بتایا جاتا ہے تاہم پولیس مقتول کے ورثا سے مزید معلومات حاصل کر رہی ہے۔ 

 انھوں نے مزید بتایا کہ واقعہ میں اسلحے کے استعمال کا بھی بتایا جا رہا ہے جس کی تصدیق کرائی جا رہی ہے۔ 

 دریں اثنا جمشید روڈ سویرا اپارٹمنٹ کے قریب گھر میں فائرنگ کے واقعے میں ایک شخص زخمی ہوگیا جسے فوری طبی امداد کے لیے اسپتال منتقل کیا گیا۔

جمشید کوارٹر پولیس کے مطابق مضروب کی شناخت 44 سالہ عمران کے نام سے کی گئی جبکہ واقعہ ذاتی جھگڑے کے دوران پیش آنے کا بتایا جا رہا جس کی مزید تحقیقات کی جا رہی ہے ۔