لاہور؛ مختلف علاقوں سے پانچ نامعلوم افراد کی لاشیں ملیں

لاہور میں شہر بھر سے پانچ نامعلوم افراد کی لاشیں ملی ہیں جن کی عمریں 30 سے 70 سال کے درمیان ہیں۔ 

پولیس کے مطابق فیکٹری ایریا ، جنرل اسپتال کے قریب 50 سالہ نامعلوم شخص فٹ پاتھ کنارے مردہ حالت میں ملا، اسی طرح غالب مارکیٹ کے علاقے سے 70 سالہ بزرگ شہری کی لاش ملی ہے۔ 

پولیس ذرائع کا کہنا ہے کہ شالیمار کے علاقے سے 30 سالہ شخص کی لاش ملی جبکہ علامہ اقبال ٹاؤن  بے ہوشی کی حالت میں ملنے والا شخص دوران علاج اسپتال میں دم توڑ گیا۔  

لاری اڈا مسافر خانہ کے قریب سے 40 سالہ شخص کی لاش برآمد ہوئی جبکہ گلبرگ کے علاقے سے بھی نامعلوم شخص کی لاش ملی جس کی عمر 55 سال کے لگ بھگ ہے۔ 

پولیس کا کہنا ہے کہ جاں بحق ہونے والے تمام افراد کی شناخت نہ ہو سکی، جبکہ پولیس اور تحقیقاتی اداروں کی کارروائی کے بعد لاشیں ایدھی ایمبولینس کے ذریعے مردہ خانہ منتقل کردی گئی ہیں۔