سری لنکا کی اے کرکٹ ٹیم کے اسلام آباد کی صورت حال پر تحفظات، سیریز ملتوی ہونے کا امکان

پاکستان میں موجود سری لنکا کی اے کرکٹ ٹیم نے اسلام آباد کی صورت حال پر خدشات کا اظہار کردیا جس کے بعد دونوں ٹیموں کے درمیان سیریز ملتوی ہونے کا امکان بڑھ گیا ہے۔

ایکسپریس نیوز کے مطابق اسلام آباد کی صورت حال کی وجہ سے پاکستان شاہینز اور سری لنکا اے کی ٹیموں کے درمیان جاری ون ڈے سیریز ملتوی ہونے کا امکان ہے۔

دونوں ممالک کے درمیان سیریز کا دوسرا میچ بدھ کو اسلام آباد میں شیڈول ہے۔ گزشتہ روز پہلا میچ میزبان ٹیم نے 108 رنز سے جیت لیا تھا جبکہ تیسرا اور آخری میچ 29 نومبر کو اسی مقام پر طے ہے۔

وفاقی دالحکومت کی صورتحال کے بعد مہمان ٹیم نے خدشات کا اظہار کیا جس کے بعد دونوں ممالک کے درمیان معاملے پر گفت و شنید ہوئی بھی ہوئی ہے۔ ذرائع کے مطابق دونوں ٹیموں کے بورڈ حتمی فیصلے کا اعلان کریں گے۔