پولیس کا راجن پور میں مغویوں کی باز یابی کیلیے آپریشن، تین مغوی بازیاب
پولیس کی بھاری نفری نے لونڈ گینگ کی کمین گاہ پر 3 مغویوں کی بازیابی کے لیے ٹارگٹ آپریشن کیا
راجن پور کے علاقے کچہ بنگلہ اچھا میں پولیس نے مغویوں کی بازیابی کے لیے آپریشن کیا اور لونڈ گینگ کی جانب سے اغوا کیے گئے تین مغویوں کو بازیاب کروا لیا۔
ترجمان پولیس کے مطابق پولیس کی بھاری نفری نے لونڈ گینگ کی کمین گاہ پر 3 مغویوں کی بازیابی کے لیے ٹارگٹ آپریشن کیا جس کے دوران کچہ بنگلہ اچھا میں پولیس اور ڈاکوؤں کے درمیان شدید فائرنگ کا تبادلہ ہوا۔
ترجمان پولیس کا کہنا ہے کہ پولیس کی بھرپور جوابی فائرنگ سے ڈاکو اندھیرے کا فائدہ اٹھاتے ہوئے فرار ہوگئے جبکہ پولیس ٹیم کی جانب سے ڈاکوؤں کا تعاقب کیا جا رہا ہے پولیس نے لونڈ گینگ کی جانب سے اغوا کیے گئے تین مغویوں کو بحفاظت بازیاب کروا لیا گیا۔