کراچی؛ سائٹ کے علاقے میں دیرینہ دشمنی پر ایک شخص قتل

سائٹ ایریا میٹروول میں فائرنگ کے واقعے میں ایک شخص جاں بحق ہوگیا ، پولیس واقعے کو دیرینہ دشمنی کا شاخسانہ قرار دے رہی ہے ۔

سائٹ ایریا میٹروول گورنمنٹ ڈگری کالج کے قریب فائرنگ کے واقعہ میں ایک شخص جاں بحق ہوگیا جس کی لاش ضابطے کی کارروائی کے لیے سول اسپتال  لے جائی گئی۔  اس حوالے سے ایس ایچ او سائٹ اے چوہدری جاوید نے بتایا کہ مقتول کی شناخت 50 سالہ رضا خان کے نام سے کی گئی جبکہ ابتدائی تحقیقات میں واقعہ دیرینہ دشمنی کا شاخسانہ بتایا جا رہا ہے۔ 

 مقتول کا آبائی تعلق ڈیرہ اسمٰعیل خان سے ہے وہاں پر کچھ عرصہ قبل مقتول کے بھائی کو بھی قتل کیا گیا تھا جبکہ آبائی شہر میں ان کا جائیداد کا بھی تنازعہ چل رہا ہے تاہم پولیس کلوز سرکٹ کیمروں کو تلاش کر کے فوٹیجز حاصل کرنے کی کوششیں کر رہی ہے تاکہ ملزمان کی شناخت میں مدد مل سکے جبکہ پولیس مقتول کے اہلخانہ سے بھی مزید معلومات حاصل کر رہی ہے ۔