کیرتی سریش نے انتھونی تھٹل کے ساتھ اپنے تعلق کی تصدیق کر دی

معروف اداکارہ کیرتی سریش نے بالآخر اپنے بزنس مین بوائے فرینڈ انتھونی تھٹل کے ساتھ پہلی تصویر شیئر کر کے اپنے تعلقات کی تصدیق کر دی ہے۔ 

اس پوسٹ کے بعد ان کی شادی کی افواہوں نے مزید زور پکڑ لیا ہے۔ رپورٹس کے مطابق، دونوں دسمبر میں گووا میں ایک نجی تقریب میں شادی کے بندھن میں بندھنے جا رہے ہیں۔

کیرتی سریش نے انسٹاگرام پر ایک تصویر پوسٹ کی جس میں وہ اور انتھونی تھٹل دیوالی کی آتشبازی کا لطف اٹھاتے نظر آ رہے ہیں۔ تصویر کے ساتھ اداکارہ نے ایک جذباتی کیپشن میں لکھا: "15 سال اور بڑھ رہے ہیں (لازوال محبت کا نشان، نظر بد سے بچاؤ کا اموجی)"۔

کیرتی کی اس پوسٹ پر ان کے مداحوں کے ساتھ ساتھ مشہور شخصیات نے بھی محبت بھرے تبصرے کیے۔ اداکارہ ملویکا موہنان نے بھی اس پوسٹ پر اپنی حیرانی کا اظہار کرتے ہوئے کہا:"مجھے بالکل اندازہ نہیں تھا کہ NYKE کا یہی اصل مطلب تھا"۔

ان کے علاوہ، کاجل اگروال، سمانتھا رُتھ پربھو، نذرینہ فہد، تروینو تھامس، اور ترشا کرشنن سمیت کئی دیگر ساتھی اداکاروں نے بھی کیرتی کو مبارکباد دی۔

رپورٹس کے مطابق، دونوں کی شادی 11 دسمبر کو گووا میں ایک نجی تقریب میں ہوگی، جس میں صرف قریبی خاندان اور دوست شرکت کریں گے۔ اگرچہ کیرتی سریش نے اب تک اپنی شادی کے منصوبے پر کوئی تصدیق نہیں کی، لیکن کہا جا رہا ہے کہ تیاریوں کا آغاز ہو چکا ہے۔

کام کے محاذ پر، کیرتی سریش اپنی پہلی بالی ووڈ فلم "بیبی جون" کی ریلیز کے لیے بھی تیار ہیں، جس میں وہ ورون دھون کے ساتھ نظر آئیں گی۔