بھارتی فلم انڈسٹری کے مشہور اداکار ناگ ارجن نے اپنے چھوٹے بیٹے اکھل اکی نینی کی منگنی کا اعلان کر دیا۔ یہ خوشخبری انہوں نے اپنے سوشل میڈیا اکاؤنٹ پر شیئر کی، جہاں انہوں نے اپنی ہونے والی بہو زینب راؤدجی کو اپنے خاندان میں خوش آمدید کہا۔
ناگ ارجن نے پلیٹ فارم X (سابقہ ٹوئٹر) پر لکھا: "ہمیں یہ اعلان کرتے ہوئے خوشی ہو رہی ہے کہ ہمارے بیٹے کی منگنی زینب راؤدجی سے ہو گئی ہے۔ ہم زینب کو اپنے خاندان میں خوش آمدید کہتے ہیں اور آپ سب سے دعاؤں اور محبت بھرے پیغامات کی درخواست کرتے ہیں۔"
اداکار اکھل اکی نینی نے بھی انسٹاگرام پر اپنی اور زینب کی تصویریں شیئر کرتے ہوئے کہا: "مجھے اپنی ہمیشہ کے لیے ساتھی مل گئی۔ زینب راؤدجی اور میں خوشی سے منگنی کا اعلان کرتے ہیں۔"
زینب راؤدجی ایک مشہور آرٹسٹ اور مصورہ ہیں جو کئی بڑے آرٹ نمائشوں کی میزبانی کر چکی ہیں۔ وہ ایک لائف اسٹائل سوشل میڈیا انفلوئنسر بھی ہیں اور معروف صنعتکار ظلفی راؤدجی کی بیٹی ہیں۔ زینب ممبئی میں پیدا ہوئیں لیکن ان کی پرورش حیدرآباد میں ہوئی۔
اکینی خاندان میں خوشیوں کا ماحول ہے کیونکہ اکھل اکی نینی کی منگنی کے ساتھ ساتھ بڑے بیٹے ناگا چیتنیا اور ان کی منگیتر شبھیتا دھولپالا کی شادی کی تیاریاں بھی زور و شور سے جاری ہیں۔ یہ شادی 4 دسمبر کو حیدرآباد میں ہوگی۔