سلمان خان کی فلم "سکندر" کے لیے خونریز اور انتقامی ٹرین ایکشن سین کی تیاریاں

بالی ووڈ کے سپر اسٹار سلمان خان اپنی آنے والی فلم "سکندر" کے ایک اہم اور دلچسپ سین کے لیے تیار ہیں۔ 

رپورٹس کے مطابق ہدایتکار اے آر مروگاداس نے ایک شاندار ٹرین ایکشن سیکوئنس کی منصوبہ بندی کی ہے جو فلم کا سب سے نمایاں حصہ ہوگا۔

ممبئی کے بورولی اسٹوڈیو میں ایک وسیع اور حقیقی منظر کے لیے خصوصی سیٹ تیار کیا گیا ہے۔ اس سین میں سلمان خان ایک گینگ کے خلاف خونریز لڑائی کرتے نظر آئیں گے۔ 

ایک ذریعے نے بتایا: "یہ سین بڑے پیمانے پر فلمایا جا رہا ہے۔ ہدایتکار نے ایکشن کوریوگرافر کو یہ بریف دیا ہے کہ یہ سین انتقامی اور خونریز ہونا چاہیے۔"

منظر کو مزید دلچسپ بنانے کے لیے 350 افراد کے ساتھ عوامی سینز بھی فلمائے گئے ہیں۔ سیکیورٹی خدشات کے پیش نظر، شوٹنگ مختلف مقامات پر جاری رہے گی، اور جنوری کے آخر تک ممبئی میں شوٹنگ مکمل کرنے کا منصوبہ ہے۔

فلم "سکندر" میں سلمان خان کے ساتھ راشمیکا مندنا، کاجل اگروال، اور پرتیک ببر سمیت کئی مشہور اداکار شامل ہیں۔ فلم کی ہدایتکاری اے آر مروگاداس نے کی ہے اور اسے ساجد ناڈیاڈ والا پروڈیوس کر رہے ہیں۔ فلم کا ایک بڑا حصہ پہلے ہی حیدرآباد میں مکمل ہو چکا ہے، اور یہ عید 2025 پر سینما گھروں کی زینت بنے گی۔