راولپنڈی:
خیبرپختونخوا کے ضلع شمالی وزیرستان کے علاقے سید گئی میں مسافر کوچ کو پیش آنے والے حادثے کے نتیجے میں ایک شخص جاں بحق ہوگیا تاہم پاک فوج کے بروقت ریسکیو آپریشن سے قیمتیں جانیں محفوظ رہیں۔
پاک فوج کے شعبہ تعلقات عامہ آئی ایس پی آر کے مطابق سید گئی کے قریب مسافر کوچ کھائی میں گری جس کے نتیجے میں ایک شخص جاں بحق جبکہ 10 زخمی ہوئے۔
پاک فوج نے فوراً ریسکیو آپریشن کرتے ہوئے زخمی مسافروں کو کھائی سے نکال کے بروقت طبی امداد دینے میں ریسکیو اداروں کی مدد کی اور انہیں قریبی اسپتال پہنچایا۔
آئی ایس پی آر کے مطابق واقعے کی اطلاع ملتے ہی پاک فوج کا ریسکو اینڈ پیرامیڈیکل اسٹاف جاۓ حادثہ کی طرف روانہ کیا گیا جس نے موقع پر پہنچ کر زخمیوں کو ہنگامی طبی امداد فراہم کر کے انہیں ڈی ایچ کیو اسپتال بنوں منتقل کیا۔
امدادی کاروائی میں پاک فوج کے ساتھ ریسکو 1122 کی ٹیم بھی موجود تھیں جبکہ علاقے کے لوگوں نے بروقت ریسکو آپریشن اور امداد پر پاک فوج کا شکریہ ادا کیا۔