پاکستان اور آذربائیجان کے درمیان تجارتی شراکت داری کے فروغ پر اتفاق

پاکستان اور آذربائیجان کے مابین تجارتی شراکت داری کے فروغ پر اتفاق ہو اہے۔

وفاقی وزیر برائے نجکاری و سرمایہ کاری عبدالعلیم خان نے آذربائیجان کی کمپنیوں کو بھی پاکستان میں سرمایہ لگانے اور بزنس کرنے کی پیشکش کرتے ہوئے کہا ہے کہ ہمیں اپنے باہمی تعلقات کو بزنس اور دوطرفہ ٹریڈ میں تبدیل کرنے کی ضرورت ہے۔

وزارت نجکاری و سرمایہ کاری کے مطابق ان خیالات کا اظہار انہوں نے ہفتہ کو ملاقات کے لیے آئے ہوئے آذربائیجان کے پاکستان میں سفیرخضر فرادوف سے گفتگو کرتے ہوئے کیا۔ وفاقی وزیر نے اپنے حالیہ دورہ آذربائیجان کو یادگار قرار دیتے ہوئے کہا کہ وہاں ملاقاتیں مثبت اور امید افزا رہیں۔ باہمی تعلقات کو مزید مضبوط اور پاکستان و آذربائیجان میں روابط بڑھانا چاہتے ہیں۔

انہوں نے کہا کہ پاکستان سیاحت سمیت آذربائیجان کے ساتھ مختلف شعبوں میں دوطرفہ تعاون کو فروغ دے سکتا ہے۔ ہمیں اپنے باہمی تعلقات کو بزنس اور دوطرفہ ٹریڈ میں تبدیل کرنے کی ضرورت ہے۔ 

وفاقی وزیر نے آذربائیجان کی کمپنیوں کو بھی پاکستان میں سرمایہ لگانے اور بزنس کرنے کی پیشکش کی اور ملاقات میں کراچی سے سکھر اور سکھر سے حیدرآباد کے ایم 6 اور ایم 9 موٹرویز کے لیے سرمایہ کاری پر بھی گفتگو ہوئی جب کہ آذربائیجان کے سفیرخضر فرادوف نے بھی ملاقات میں پاکستان سے تعاون میں فروغ کے عزم کا اظہار کیا۔

وفاقی وزیر نجکاری و سرمایہ کاری عبدالعلیم خان نے کہا ہے کہ پاکستان میں غیر ملکی سرمایہ کاروں کے لیے مختلف شعبوں میں بڑے مواقع موجود ہیں۔ آذربائیجان کے سفیر خضر فرادوف نے کہا کہ پاکستان میں سرمایہ کاری اور مشترکہ منصوبوں پر کام کریں گے۔ 

ملاقات میں پاکستان، آذربائیجان اور ترکیہ کی مشترکہ کاوشوں کی تجویز پر بھی غور کیا گیا اور یہ بھی طے پایا ہے کہ آذربائیجان کے لیے بورڈ آف انویسٹمنٹ سے فوکل پرسن کی نامزدگی کے ساتھ قریبی رابطہ رکھا جائے گا۔