بلائنڈ کرکٹ ورلڈ کپ، پاکستان نیپال کو شکست دیکر فائنل میں پہنچ گیا

چوتھے ٹی 20 بلائنڈ کرکٹ ورلڈ کپ کے سیمی فائنل میں پاکستان نے نیپال کو شکست دے دی۔

ڈی ایچ اے گراؤنڈ ملتان میں کھیلے گئے میچ میں پاکستان نے نیپال کی جانب سے 95 رنز کا ہدف بغیر کوئی وکٹ گنوائے 5.3 اوورز میں حاصل کرلیا۔ کامران اختر نے 21 گیندوں پر 63 اور بابرعلی نے 14 گیندوں پر 32 رنز اسکور کیے۔

پاکستان نے نیپال کیخلاف ٹاس جیت کر فیلڈنگ کا فیصلہ کیا تھا، نیپال نے پاکستان کیخلاف 20 اوورز میں 7 وکٹوں کے نقصان پر 94 رنزبنائے۔

نیپال کی جانب سے دروگا نے 42 بالز پر 40 رنزبنائے رامیض نے 30 بالز پر 17 رنز ناٹ أؤٹ اسکور کئے۔

اس سے قبل گروپ کے اختتامی میچز میں گرین شرٹس نے افغانستان کو 7 وکٹ سے مات دے کر مسلسل پانچویں فتح اپنے نام کی تھی جبکہ بنگلا دیش نے جنوبی افریقا کو 10 وکٹ سے آؤٹ کلاس کردیا۔

دوسراسیمی فائنل بنگلا دیش اور سری لنکا کے درمیان دوپہر ایک بجے شیڈول ہے۔