وزیر اعظم شہباز شریف 2 روزہ دورے پر سعودی عرب پہنچ گئے

وزیراعظم شہباز شریف 2 روزہ دورے پر سعودی عرب کے دارالحکومت ریاض پہنچ گئے۔

سرکاری میڈیا کے مطابق ریاض کے نائب گورنر شہزادہ محمد بن عبدالرحمن بن عبد العزیز نے وزیرِ اعظم کا کنگ خالد انٹرنیشنل ایئرپورٹ پر استقبال کیا۔ وزیر اطلاعات عطاء اللہ تارڑ اور معاون خصوصی طارق فاطمی بھی وزیرِاعظم کے ہمراہ ہیں۔

شہباز شریف صاف پانی و آبی ذخائر کے تحفظ کے حوالے سے ریاض میں منعقدہ ون واٹر سربراہی اجلاس میں پاکستان کی نمائندگی کریں گے۔

سعودی عرب، فرانس، قزاقستان اور عالمی بینک کے اشترک سے منعقدہ ون واٹر سربراہی اجلاس کا مقصد عالمی سطح پر بین الاقوامی تعاون اور اعلیٰ سطح سیاسی عزم کے ذریعے آبی ذخائر کے بہتر انتظام و تحفظ کا حصول یقینی بنانا ہے۔

وزیرِاعظم سربراہی اجلاس کے دوران صاف پانی کے ذخائر کی بحالی، تحفظ اور اس حوالے سے جدت پر خطاب کریں گے جس مین وہ آبی ذخائر کے تحفظ، ماحولیاتی تبدیلی سے بچاؤ کی تیاری، پینے کے پانی کے معیار کی بہتری، روزگار کی فراہمی اور آبی حیات کے تحفظ کیلئے حکومت کی جانب سے اٹھائے گئے اقدامات پر روشنی ڈالیں گے۔

وزیرِ اعظم ماحولیاتی تبدیلی کی وجہ سے آئے سیلابوں، موسموں میں بے وقت تبدیلی اور بڑھتے ہوئے درجہ حرارت کے آبی زخائر و آبی حیات پر اثرات پر قابو پانے کیلئے بین الاقوامی تعاون کی اہمیت پر بھی روشنی ڈالیں گے۔

وزیرِ اعظم عالمی دنیا کو آبی وسائل کے پائیدار و بہتر انتظام کیلئے اقدامات کی دعوت بھی دیں گے۔ اس موقع پر وزیرِاعظم کی سربراہی اجلاس میں شریک عالمی رہنماؤں سے ملاقاتیں بھی متوقع ہیں۔