مشہور پاکستانی اداکار و پروڈیوسر شہریار منور نے اپنی شادی کی خبروں کی تصدیق کردی ہے۔
شہریار منور نے حال ہی میں ایک انٹرویو کے دوران اپنی شادی کی تصدیق کرتے ہوئے کہا ’میں دسمبر میں شادی کر رہا ہوں اور میری اہلیہ شوبز انڈسٹری سے تعلق نہیں رکھتیں۔ میں دسمبر کے آخر میں شادی کر رہا ہوں، آپ سب ہماری دعا کریں۔‘
اطلاعات کے مطابق شہریار منور کی شادی ماحین صدیقی سے ہونے والی ہے جو چند شوبز پروجیکٹس میں کام کر چکی ہیں۔ مداح شہریار کی شادی کی خبر پر خوشی کا اظہار کر رہے ہیں اور ان کے نئے زندگی کے سفر کے لیے نیک خواہشات کا اظہار کر رہے ہیں۔
یاد رہے کہ شہریار منور نے ڈرامہ سیریل ’زندگی گلزار ہے‘سے خوب شہرت حاصل کی جس کے بعد کئی کامیاب ڈراموں میں اداکاری کی جن میں ’میرے درد کو جو زباں ملے‘، ’تنہائیاں نئے سلسلے‘، ’کہی ان کہی‘، ’آسمانوں پہ لکھا‘، ’پہلی سی محبت‘، ’کچھ ان کہی‘، اور ’رد‘ شامل ہیں۔ وہ اس وقت نئے ڈرامہ سیریل ’اے عشقِ جنون‘ میں نظر آ رہے ہیں۔