رحیم یار خان میں پولیس اور ڈاکوؤں میں فائرنگ کے تبادلے کے بعد 2 مغوی بازیاب کروا لیے گئے۔
ترجمان پنجاب پولیس کے مطابق رحیم یارخان پولیس نے کچہ بھونگ کے علاقے میں بڑی کارروائی کی۔ ڈاکوؤں سے فائرنگ کے تبادلے کے بعد 2 مغویوں کو بازیاب کروالیا گیا۔ پولیس آپریشن کے دوران ایک ڈاکو کے زخمی ہونے کی اطلاع ہے۔ ڈاکوؤں کا تعاقب جاری ہے۔ ڈاکوؤں کے زیراستعمال 3 موٹر سائیکلز بھی برآمد کی گئیں۔
ترجمان نے مزید بتایا کہ پولیس نےکچہ سونمیانی کے علاقے میں ڈاکوؤں کا گھیراؤ کر لیا۔ گزشتہ رات ڈاکوؤں نے بھونگ کے علاقے سے 3 شہریوں کو اغوا کیا تھا۔ ڈی ایس پی بھونگ کی قیادت میں پولیس کی بھاری نفری ڈاکوؤں کا تعاقب جاری رکھے ہوئے ہے۔