ڈسٹرکٹ ایسٹ کے علاقے گلشن جمال میں موٹر سائیکل سوار ڈاکوؤں نے دن دیہاڑے نوبیاہتا جوڑے کو گھر کی دہلیز پر لوٹ لیا، واردات کی فوٹیج سوشل میڈیا پر وائرل ہوگئی۔
فوٹیج میں دیکھا جا سکتا ہے کہ گزشتہ روز ہفتے کی دوپہر کار میں سوار نوبیاہتا جوڑا جیسے ہی گلی میں گھر کی دہلیز پر پہنچتا ہے تعاقب میں آنے والے موٹر سائیکل سوار 2 ڈاکوؤں نے گھر کی دہلیز پر اسلحے کے زور پر یرغمال بنا کر لوٹ لیا ، دونوں ڈاکو شلوار قمیض پہنے ہوئے تھے جبکہ واردات کے دوران ایک ڈاکو نے گلی میں آنے والے دیگر مکینوں پر اسلحہ تان لیا جس کے باعث وہ خوفزدہ ہو کر گھروں میں چلے گئے۔
واردات کے دوران ڈاکوؤں نے خاتون اور اس کے شوہر کو طلائی زیورات، پرس، موبائل فون اور نقدی سے محروم کر دیا اور انتہائی اطمینان کے ساتھ موٹر سائیکل پر سوار ہو کر واپس اسی راستے چلے گئے جہاں سے وہ کار کے تعاقب میں واردات کے لیے آئے تھے۔
واقعہ کے بعد علاقہ مکینوں میں شدید اشتعال پایا جاتا ہے ان کا کہنا تھا کہ گلیوں اور محلوں میں ڈاکو کھلے عام مسلح ہو کر دندناتے ہوئے گھوم رہے ہیں اور انھیں نہ تو کوئی پکڑنے والا ہے اور نہ ہی پولیس کا دور تک نام و نشان نہیں ہے۔