بالی ووڈ کے ایکشن ہیرو سونو سود کی سنسنی اور تھرلر سے بھرپور ایکشن فلم ’فتح‘ کا ٹیزر جاری کر دیا گیا۔
فلم ’فتح‘ میں سونو سود ہدایتکاری کی دنیا میں بھی ڈینیو کر رہے ہیں جبکہ اس میں وہ بھرپور ایکشن ہیرو کے کردار میں بھی نظر آئیں گے۔ فلم میں جیکولین فرنینڈس بھی ایک اہم کردار ادا کر رہی ہیں جبکہ سینئر اداکار نصیر الدین شاہ بھی اہم کردار نبھائیں گے۔
ٹیزر دیکھ کر معلوم ہوتا ہے کہ فلم کی کہانی سنسنی خیز، ایکشن تھرلر اور سازشوں پر مبنی ہے۔
سونو سود فلم میں فتح کا مرکزی کردار نبھا رہے ہیں، جو ماضی کو پیچھے چھوڑ کر پنجاب میں پُرسکون زندگی گزارنے کا خواہاں ہے۔ لیکن جب ایک مقامی لڑکی سائبر مافیا کے ہاتھوں لاپتہ ہو جاتی ہے، تو فتح کو اپنی صلاحیتوں کا دوبارہ استعمال کرنا پڑتا ہے وہ انتقام کی راہ پر نکلتا ہے اور پورے سائبر مافیا نیٹ ورک کو ختم کرنے کی ٹھان لیتا ہے۔
یہاں دلچسپ بات یہ ہے کہ فلم میں جیکولین فرنینڈس نے بھی ایکشن میں مہارت دکھائی ہے۔ سونو سود نے انسٹاگرام پر ٹیزر شیئر کرتے ہوئے لکھا، ’کردار ایماندار رکھنا، جنازہ شاندار نکلے گا۔‘
واضح رہے کہ فلم ’فتح‘ 10 جنوری 2025 کو سینما گھروں کی زینت بنے گی۔ اس فلم کے ایکشن مناظر فلمانے کے لیے ہالی ووڈ کے ماہرین کی خدمات لی گئی ہیں جبکہ فلم شِکتی ساگر پروڈکشنز اور زی اسٹوڈیوز نے پروڈیوس کی ہے۔