پاکستان فلم انڈسٹری کی خوبصورت، باصلاحیت اور منفرد اداکارہ بابرہ شریف کی آج 70 ویں سالگرہ ہے۔
وہ لالی ووڈ کی ایسی فلمی ہیروئن ہیں جنہوں نے اپنے تین عشروں پر مشتمل طویل فلمی کیریئر کے دوران اپنی اداکاری، دلکش مسکراہٹ اور لاجواب پرفارمنس سے مداحوں کے دلوں پر خوب راج کیا۔
10 دسمبر 1954ءکو پیدا ہونے والی خوبرو اداکارہ بابرہ شریف نے اپنے فن کا آغاز 1973ء میں ڈرامہ کرن کہانی سے کیا تھا اور جلد ہی فلم انڈسٹری کا حصہ بن گئیں۔ 1970 اور 1980 کی دہائیوں میں وہ پاکستان کی صف اول کی اداکاراؤں میں شامل ہوئیں۔
بابرہ شریف نے 30 سالہ کیریئر میں 100 سے زیادہ فلموں میں کام کیا،ان کی مشہور فلموں میں میرا نام ہے محبت، شبانہ اور شریف بدمعاش سمیت متعدد فلموں نے کامیابی کے نئے ریکارڈ زقائم کیے۔
بابرہ شریف نے چاکلیٹی ہیرو وحید مراد، شہنشاہ جذبات محمد علی اور سلطان راہی سمیت اپنے دور کے نامور اداکاروں کے ساتھ جلوہ گر ہو کر اپنی صلاحیتوں کا لوہا منوایا۔
تین عشروں پر مشتمل طویل کیریئر کے دوران بابرہ شریف نے اپنی اداکاری کے لیے کئی بڑے ایوارڈزحاصل کیے، جن میں8مرتبہ بہترین اداکاری کے نگار ایوارڈز بھی شامل ہیں۔