ڈسٹرکٹ ایسٹ کے علاقے گلستان جوہر میں موٹر سائیکل سوار 3 ڈاکوؤں نے انتہائی دیدا دلیری کے ساتھ دن دیہاڑے کار سوار شہری کو اسلحے کے زور پر لوٹ لیا، ڈاکوؤں کی لوٹ مار کرنے کی موبائل فون سے بنائی گئی ویڈیو سوشل میڈیا پر وائرل ہوگئی۔
بنائی گئی ویڈیو میں تینوں ڈاکوؤں کے چہرے واضح دکھائی دے رہے ہیں ویڈیو میں بتایا گیا کہ لوٹ مار کا واقعہ گلستان جوہر کے علاقے جوہر اسکوائر کے قریب قائم نجی لیبارٹری کے سامنے مین روڈ پر سڑک کنارے کھڑی کار کے شہری کے ساتھ پیش آیا جس میں دیکھا جا سکتا ہے کہ آلٹو کار میں سوار شہری کو 125 موٹر سائیکل پر سوار 3 ڈاکوؤں نے دن دیہاڑے انتہائی دیدا دلیری کے ساتھ لوٹ لیا اور موٹر سائیکل پر سوار ہو کر موقع سے فرار ہوگئے۔
ویڈیو میں لٹنے والے شہری نے بتایا کہ ڈاکو واردات کے دوران کار کی چابی، موبائل فونز ، پرس اور مجھ سمیت بھائی سے مجموعی طور پر 40 ہزار کے قریب نقدی چھین کر فرار ہوئے ہیں۔
بنائی گئی ویڈیو میں لیبارٹری کی حفاظت پر مامور سیکیورٹی گارڈ سے بھی سوال کیا گیا کہ آپ کی جانب سے کوئی ردعمل نہیں دیا گیا جس پر ان کا کہنا تھا کہ ہمیں اجازت نہیں ہے، کار سوار متاثرہ شہری کا کہنا ہے کہ اس سے قبل بھی میرے ساتھ لوٹ مار کی واردات ہو چکی ہے۔