لاہور:
وزیر اعلیٰ پنجاب مریم نواز شریف کا کہنا ہے کہ پاک چین تعلقات کے فروغ میں کیمونسٹ پارٹی آف چائنہ کا کردار کلیدی حیثیت رکھتا ہے، چین پاکستان کمیونٹی کی تشکیل میں عوامی سطح پر بڑھتے ہوئے رابطے اہم کردار ادا کر رہے ہیں۔
دورہ چین کے موقع پر وزیر اعلیٰ پنجاب مریم نواز شریف کی کیمونسٹ پارٹی آف چائنہ کے انٹرنیشنل ڈیپارٹمنٹ آمد ہوئی۔ بیجنگ میں وزیر اعلیٰ مریم نواز شریف سے کیمونسٹ پارٹی آف چائنہ انٹرنیشنل ڈیپارٹمنٹ کے منسٹر لیو جیان چاؤ کی ملاقات ہوئی۔ انہوں نے پرتپاک خیر مقدم کرنے پر منسٹر لیو جیان چاؤ کا شکریہ ادا کیا۔
وزیر اعلیٰ مریم نوازشریف نے کیمونسٹ پارٹی آف چائنہ کی دوراندیش قیادت کو سراہتے ہوئے کہا کہ چین کی وژنری لیڈر شپ نے چین کو عالمی طاقت کے طور پر ابھرنے میں رہنمائی فراہم کی۔
انہوں نے کہا کہ پاک چین دوستی فولاد کی طرح مضبوط اور آزمودہ ہے، پاک چین دوستی علاقائی اور بین الاقومی سیاست کے نشیب وفراز سے متاثر نہ ہونے والا پائیدار تعلق ہے۔ پاک چین اسٹریٹجک پارٹنر شپ ہر موسم کے گرم و سرد سے بالاتر ہے۔
مریم نواز شریف نے کہا کہ لوکل گورننس اور دیہی ترقی کے لیے چین کے تجربات سے فائدہ اٹھانا چاہتے ہیں، یوتھ ایمپاورمنٹ اور استعداد کار میں اضافے کے لیے چین کے تعاون کو سراہیں گے۔ ووکیشنل ٹریننگ پروگرام کے سلسلے میں چین سے بھرپور تعاون چاہتے ہیں۔
وزیراعلیٰ پنجاب نے کہا کہ بڑھتے ہوئے عوامی روابط اور ثقافتی تعلقات شاہراہ ریشم کا ورثہ اور میراث ہے۔ چین اور پنجاب کے ثقافتی روابط کے لیے پائیدار اقدامات کریں گے، پاک چین تعلقات کی میراث کو پروان چڑھانے کے لیے نوجوان نسل پر فوکس کرنا ہوگا۔
شاندار میزبانی پر وزیر اعلیٰ مریم نواز شریف نے منسٹر لیو جیان چاؤ سے اظہار تشکر کیا۔ کیمونسٹ پارٹی آف چائنہ کے انٹرنیشنل ڈیپارٹمنٹ کے منسٹر لیو جیان چاؤ نے وزیر اعلیٰ مریم نوازشریف کی آمد پر شکریہ ادا کیا۔