انڈین پنجابی انڈسٹری کی مشہور اداکارہ سونم باجوا اب بالی وڈ میں بھی اپنی دھاک بٹھانے کے لیے تیار ہیں۔ حال ہی میں سونم باجوا نے دو بڑے پروجیکٹس سائن کیے ہیں: ہاؤس فل 5 اور باغی 4۔ ان دونوں فلموں میں ان کی موجودگی مداحوں کے لیے خوشخبری سے کم نہیں۔
سونم باجوا اپنی پہلی فلم ہاؤس فل 5 کے بعد ایک بار پھر مشہور پروڈیوسر ساجد نادیادوالا کے ساتھ کام کریں گی۔ ایکشن اور رومانس سے بھرپور باغی 4 میں وہ مرکزی کردار ادا کریں گی، جہاں ان کا ساتھ بالی وڈ کے مشہور ایکشن ہیرو ٹائیگر شروف دیں گے۔
باغی سیریز کی چوتھی قسط کے لیے مداح کافی پرجوش ہیں۔ فلم کا پہلا پوسٹر، جس میں ٹائیگر شروف اور سنجے دت کو دکھایا گیا، پہلے ہی دھوم مچا چکا ہے۔ اب سونم باجوا کے شامل ہونے سے فلم کی مزید پذیرائی متوقع ہے۔
اے ہرشا کی ہدایت کاری میں بننے والی یہ فلم سیریز کا ایک اور دلچسپ باب ثابت ہوگی۔ فلم کی شوٹنگ کا آغاز ہو چکا ہے، اور سونم باجوا جلد ہی سیٹ پر شامل ہوں گی۔ یہ فلم 5 ستمبر 2025 کو سینما گھروں میں ریلیز ہوگی۔