لاہور:
کٹاس راج میں مذہبی رسومات کی ادائیگی کے لیے بھارتی ہندو یاتری 19 دسمبر کو واہگہ چیک پوسٹ کے راستے پاکستان پہنچیں گے۔
متروکہ وقف املاک بورڈ کے ایڈیشنل سیکریٹری( شرائنز)سیف اللہ کھوکھر، ممبران پاکستان ہندو مندر مینجمنٹ کمیٹی، اعلی حکام اور مقامی ہندو رہنما بھارت سے آنے والے مہمانوں کا استقبال کریں گے۔
ہندو یاتریوں کی پاکستان آمد کے حوالے سے سیکیورٹی رہائش، ٹرانسپورٹ سمیت دیگر انتظامات مکمل کر لیے گئے ہیں۔
ڈپٹی سیکریٹری جنرل (شرائنز )عمر جاوید اعوان کے مطابق ہندو یاتری 19دسمبر کو پاکستان پہنچنے کے بعد اسپیشل بسوں کے ذریعے واہگہ بارڈر سے گوردوارہ ڈیرہ صاحب میں ایک دن قیام کریں گے۔
انہوں نے کہا کہ بھارتی یاتری 20 دسمبر کو لاہور سے کٹاس راج مندر(ضلع چکوال) روانہ ہوں گے،21 دسمبر کو ہندو یاتری کٹاس راج مندر میں اپنی مذہبی رسومات (بھانو سپتمی ) ادا کریں گے۔
ان کا کہنا تھا کہ شام میں دیپ مالا (دیے جلانے کی رسومات) ادا کی جائیں گی اور ہندو یاتری 22 دسمبر کو چکوال سے واپس لاہور روانہ ہوں گے۔
بھارت سے آنے والے یاتری لاہور میں قیام کے دوران شری کرشنا مندر راوی روڈ اور والمیک مندرانارکلی کا دورہ کریں گے، ہندو یاتری 7روزہ دورہ مکمل ہونے پر 25 دسمبر کو واپس روانہ ہوں گے۔