اداکارہ عائزہ خان نے تعلیم کیلیے دوبارہ ’’ اسکول ‘‘ کا رخ کرلیا

متعدد پاکستانی ڈراموں میں اپنی اداکاری کا لوہا منوانے والی باصلاحیت اداکارہ عائزہ خان نے دوبارہ تعلیم کا سلسلہ شروع کردیا۔

سال 2009 میں ڈرامہ ’’ تم جو ملے‘‘ سے شوبز میں انٹری کرنے والی عائزہ نے 2013ء میں ڈرامہ سیریل ’’پیارے افضل ‘‘ کے ساتھ شہرت کی بلندیوں کو چھو لیا تھا۔

اس کے بعد انھوں نے ’’ میرے مہربان ‘‘ ، ’’ تم کون پیا ‘‘ ، ’’ محبت تم سے نفرت ہے ‘‘ ، ’’ میں ‘‘ اور ’’ میرے پاس تم ہو ‘‘ جیسے سیریلز میں اداکاری کر کے انڈسٹری میں اپنی دھاک بٹھالی۔

عائزہ نے نہ صرف سنجیدہ کرداروں میں اپنی مہارت کا اظہار کیا بلکہ کامیڈی میں بھی اپنی بے ساختگی اور شوخ و چنچل اداؤں کے سبب سب کے چہروں پر مسکراہٹیں بکھیرنے میں کامیاب رہیں۔

عائزہ ڈراموں سے زیادہ ماڈلنگ میں مصروف رہتی ہیں اور حال ہی میں انھوں نے آنے والے ڈرامے ’’ ہمراز ‘‘ کی شوٹنگ مکمل کی ہے جس کے ساتھ ہی وہ لندن جا پہنچیں اور اپنی زندگی سے متعلق اپڈیٹ فراہم کرکے مداحوں کو حیران کردیا۔

فوٹو اینڈ ویڈیو شیئرنگ ایپ پر تصاویر کا ایک سلسہ پوسٹ کرتے ہوئے اداکارہ نے بتایا کہ انھوں نے تعلیم کا سلسلہ دوبارہ شروع کیا ہے اور اب باقاعدہ اداکاری کی تربیت لینے کے لیے لندن کی رائل اکیڈمی آف ڈرامیٹک آرٹ کا رخ کیا ہے جو ان کا برسوں پرانا خواب تھا۔