بالی ووڈ کی مشہور زمانہ فلم ’جب وی میٹ‘ کے اسٹارز کرینہ اور شاہد کپور برسوں بعد ایک مرتبہ پھر ساتھ نظر آئے ہیں جس کی تصویر سوشل میڈیا پر وائرل ہو رہی ہے۔
ماضی میں ایک دوسرے کی محبت میں گرفتار رہنے والی مقبول جوڑی کو ایک ساتھ دیکھ کر مداح حیران رہ گئے اور خوشی کا اظہار کر رہے ہیں۔
ماضی میں کرینہ اور شاہد کے درمیان محبت کا رشتہ رہا تاہم سالوں تک ایک دوسرے کو ڈیٹ کرنے کے بعد دونوں نے راہیں جدا کر کے الگ الگ شادیاں کر لیں لیکن اس کے بعد انہیں کبھی ایک ساتھ دوبارہ نہیں دیکھا گیا جبکہ ایوارڈ شوز میں بھی انہیں ایک دوسرے کو نظر انداز کرتے کئی مرتبہ دیکھا جاچکا ہے۔
تاہم حالیہ تصویر میں دونوں کو اپنے بچوں کے اسکول فنکشن میں برسوں بعد ایک ساتھ دیکھا گیا، جہاں وہ اتفاقاً قریب بیٹھے تھے۔ کرینہ کپور فنکشن میں پہلی قطار میں موجود تھیں، جبکہ شاہد کپور ان کے پیچھے بیٹھے ہوئے تھے۔
فنکشن کے دوران کرینہ کپور اور شاہد کپور دونوں نے اپنے بچوں کی پرفارمنس پر خوشی کا اظہار کیا، اس موقع پر کرینہ کے شوہر سیف علی خان بھی ان کے ہمراہ موجود تھے۔
یاد رہے کہ کرینہ کپور اور شاہد کپور کی مشہور فلم ’جب وی میٹ‘ 2007 میں ریلیز ہوئی تھی، اور اسی فلم کی شوٹنگ کے دوران دونوں نے اپنا تعلق ختم کر لیا تھا، تاہم اسکرین پر ان کی جوڑی کو مداحوں نے بےحد پسند کیا تھا اور وہ آج بھی دونوں ادکاروں کو ایک ساتھ اسکرین پر دیکھنے کے خواہش مند ہیں۔