ایشوریا رائے اور ابھیشیک بچن کی طلاق کی افواہوں کے درمیان تقریباً ایک سال بعد ایشوریا اور امیتابھ بچن ایک ساتھ دکھائی دیے، جس پر مداحوں نے خوشی کا اظہار کیا ہے۔
بچن خاندان نے آرادھیا بچن کے اسکول کی جانب سے منعقد کی جانے والی سالانہ تقریب میں ایک ساتھ شرکت کی، جس میں امیتابھ بچن، ابھیشیک اور ایشوریا رائے کو ایک ساتھ اسکول میں داخل ہوتے دیکھا جاسکتا ہے۔
آرادھیا بچن دھیرو بھائی امبانی انٹرنیشنل اسکول میں پڑھ رہی ہیں، اور اس اسکول کے سالانہ فنکشن کی کئی ویڈیوز اب تک سوشل میڈیا پر وائرل ہوچکی ہیں۔
اسکول کی سالانہ تقریب کے دوران ایشوریا رائے اور بگ بی کو تقریباً ایک سال میں پہلی بار ایک ساتھ دیکھا گیا ہے، جس کی انسٹاگرام پر پوسٹ کی گئی ویڈیو مداحوں کی توجہ کا مرکز بن گئی ہے۔
انسٹاگرام پر شیئر کی جانے والی ویڈیو میں امیتابھ بچن اور ایشوریہ رائے بات چیت کرتے ہوئے اسکول کی عمارت میں داخل ہورہے ہیں۔ جس کے بعد ایشوریا، ابھیشیک اور امیتابھ بچن اسکول انتظامیہ کے ایک کارکن سے ہنستے ہوئے بات کرنے کے بعد ایک ساتھ بیٹھ جاتے ہیں۔
ایک اور ویڈیو میں تقریب کے ہال میں داخلے کے وقت ابھیشیک بچن کا ایشوریا رائے کے لیے حفاظتی انداز نے بھی مداحوں کے دل کو موہ لیا اور کمنٹس سیکشن میں مداحوں نے طلاق کی قیاس آرائیوں کے درمیان جوڑے کو ایک ساتھ دیکھ کر راحت اور خوشی کا اظہار کیا۔
یاد رہے کہ اداکارہ ایشوریا رائے بچن اور امیتابھ بچن کو 2023 میں ’’دی آرچیز‘‘ کے پریمیئر کے دوران آخری بار اکٹھے پوز دیتے ہوئے دیکھا گیا تھا جس کے بعد اداکارہ ایک سال بعد اپنے سسر کے ساتھ نظر آئی ہیں۔