مشہور نغمہ نگار جاوید اختر نے حال ہی میں فلم "سوَدیس" کے لیے رام لیلا گانا ’پل پل ہے بھاری‘ لکھنے کے تجربے کو یاد کرتے ہوئے انکشاف کیا کہ یہ ان کے لیے ایک نہایت دباؤ والا لمحہ تھا۔
انہوں نے مزاحیہ انداز میں کہا کہ ہدایتکار آشوتوش گوواریکر نے ان کی "موت کا بہترین انتظام" کیا تھا۔
ایک انٹرویو میں جاوید اختر نے بتایا کہ آشوتوش نے انہیں واہی بلایا، جہاں فلم کی شوٹنگ جاری تھی، اور کہا کہ گانے کی فوری ریکارڈنگ ضروری ہے کیونکہ اے آر رحمان ایک ماہ کے لیے دستیاب نہیں ہوں گے۔
جاوید اختر کو بتایا گیا کہ گانے کا موضوع رامائن کے ایک اہم منظر سے متاثر ہے، جس میں سیتا جی اشوک واٹیکا میں راون کے سوالات کا جواب دیتے ہوئے رام کی عظمت کا دفاع کرتی ہیں۔
جاوید اختر نے اعتراف کیا کہ انہیں ابتدائی طور پر یہ کام ناممکن لگا، لیکن اگلی صبح، تمام دباؤ کے باوجود، انہوں نے صرف دو گھنٹوں میں یہ شاہکار گانا مکمل کر لیا۔
انہوں نے بتایا کہ گانے کی ریلیز کے بعد ایک رامائن کے ماہر نے ان کی تعریف کی، لیکن جاوید نے انکساری سے کہا کہ یہ صرف ان کے بچپن کی یادیں یا ایک قدرتی انتخاب تھا۔