احسن آباد سپر ہائی وے کے قریب جھگیوں میں آگ لگی جس سے گھریلوسامان جل کر خاکستر ہوگیا تاہم کوئی جانی نقصان نہیں ہوا۔
متاثرین کا کہنا ہے کہ جھگیوں میں آگ لگنے کا واقعہ رات 2 بجے کے بعد پیش آیا اور ہماری 30 سے 35 جھگیوں میں آگ لگی آتشزدگی سے جھگیاں مکمل طور پر تباہ ہوگئیں۔
متاثرین کا کہنا ہے کہ آگ لگنے سے کوئی جانی نقصان نہیں ہوا لیکن بستر، برتن ،کپڑے اور دیگر گھریلو سامان جل کر خاکستر ہوگیا ہے اور آگ پر قابو پالیا گیا لیکن ہمارا سارا سامان تباہ ہوگیا۔
متاثرین نے حکومت سے امداد کی اپیل کرتے ہوئے کہا کہ ہمیں گھر، بستر اور کھانا دیا جائے ہمارے بچے سردی سے کانپ رہے ہیں ہم بھیک نہیں مانگتے بلکہ برتن اور کپڑے فروخت کرتے ہیں اور ہمارا آبائی تعلق سکھر اور شکار پور سے ہے۔