وفاقی دارلحکومت میں یونس ایمرے انسٹیٹیوٹ اور ترکش کلچر سینٹر کا افتتاح

وفاقی دارلحکومت میں یونس ایمرے انسٹیٹیوٹ اور ترکش کلچر سینٹر کا افتتاح کردیا گیا۔

اسلام آباد میں یونس ایمرے انسٹیٹیوٹ اور ترکش کلچر سینٹر کی افتتاحی تقریب منعقد ہوئی، جس میں وفاقی وزیر اطلاعات عطاء اللہ تارڑ نے خصوصی خطاب کیا۔

 انہوں نے پاکستان اور ترکیہ کے درمیان گہرے برادرانہ تعلقات کو سراہتے ہوئے کہا کہ دونوں ممالک کے عوام کے درمیان گہرا لگاؤ اور محبت ہے، جو وقت کے ساتھ مزید مضبوط ہو رہی ہے۔

عطاء اللہ تارڑ نے کہا کہ پاکستان اور ترکیہ کی دوستی کسی سرحد یا اچھے برے حالات کی محتاج نہیں ہے۔ دونوں ممالک مذہب اور ثقافت کے ذریعے بھی ایک دوسرے سے جڑے ہوئے ہیں۔ انہوں نے ترکیہ کی جانب سے ہر مشکل وقت میں پاکستان کی مدد کا شکریہ ادا کرتے ہوئے کہا کہ دونوں ممالک کے تعلقات میں سیاحتی اور ثقافتی شعبے میں تعاون کے وسیع امکانات موجود ہیں۔

انہوں نے اس بات پر زور دیا کہ ثقافتی تبادلوں کو بڑھانے اور عوامی رابطوں کے فروغ سے پاکستان اور ترکیہ کے تعلقات کو مزید مضبوط بنایا جا سکتا ہے۔ وزیر اطلاعات نے دونوں ممالک کے درمیان سیاحت کے شعبے میں مشترکہ منصوبے شروع کرنے کی ضرورت پر بھی روشنی ڈالی۔