قیدی کی پوتی کو ہوس کیلیے رات کو گھر پر بلانے والا بھارتی جیلر معطل

بھارتی ریاست تامل ناڈو کے مدورائی سینٹرل جیل کے اسسٹنٹ جیلر کو ایک قیدی کی پوتی کے ساتھ نامناسب رویے کے بعد معطل کردیا گیا۔

بھارتی میڈیا کے مطابق مدورائی کے اسسٹنٹ جیلر کو قیدی کی پوتی کو اکیلے میں گھر آنے کا کہنے اور نامناسب رویے کا مقدمہ درج ہونے کی وجہ سے معطل کیا گیا۔

رپورٹ میں بتایا گیا ہے کہ اسسٹنٹ جیلر بالاگور سوامی اس لڑکی سے واقف تھا کیونکہ وہ جیل میں اپنے رشتے دار سے ملنے جاتی تھی، اپنی واقفیت کا فائدہ اٹھاتے ہوئے جیلر نے اسے مبینہ طور پر اپنے گھر اکیلے آنے کےلیے کہا۔

جیلر کی بدسلوکی کا یہ واقعہ اس وقت سامنے آیا جب لڑکی نے پولیس میں شکایت درج کرائی، جس کے نتیجے میں بالاگورسوامی کی معطلی اور قانونی کارروائی شروع کی گئی ہے۔ لڑکی کی شکایت کے بعد اس کے خاندان کے دیگر افراد نے عوامی مقام پر جیلر کر گھیر کر اس پر حملہ بھی کیا تھا جس کے بعد اسے تھانے لے جایا گیا۔

تفتیش کے بعد علم ہوا ہے کہ یہ کوئی پہلا واقعہ نہیں تھا بلکہ بالاگورسوامی اس سے قبل بھی مختلف قیدیوں کی خواتین رشتے داروں کے ساتھ اس طرح کا نامناسب سلوک کرتا رہا ہے جس کی شکایات کی گئی تھیں۔