’’رواں سال  قومی خزانے میں 70 ارب روپے آئیں گے‘‘

رواں سال قومی خزانے میں 70 ارب روپے موصول ہوں گے۔

وزیراعظم شہباز شریف نے وفاقی کابینہ کے اجلاس میں گفتگو کرتے ہوئے بتایا کہ رواں سال قومی خزانے میں 70 ارب روپے وصول ہوں گے۔

انہوں نے کہا کہ اے ڈی آر کا مسئلہ حل ہوگیا ہے، جس کے پیچھے نائب وزیراعظم اسحاق ڈار، وزیر خزانہ محمد اورنگزیب اور گورنر اسٹیٹ بینک کی کوششیں کارفرما ہیں۔ اگر یہ کوششیں نہ ہوتیں تو قومی خزانے میں 70 ارب روپے وصول نہ ہوتے جو 3 سال میں 140 ارب روپے کے لگ بھگ ہو جائیں گے۔

وزیراعظم کا کہنا تھا کہ گزشتہ برسوں میں بینکوں نے بے پناہ منافع کمایا۔ ساڑھے 22 فی صد تک پالیسی ریٹ تھا ، ایسے میں سرمایہ کاری کہاں ہونی تھی کہ اتنے مہنگے ریٹ پر کون انڈسٹری لگاتا۔ لوگ ٹی بلز میں سرمایہ کاری کرتے رہے اور بیٹھے بٹھائے نفع لیتے رہے۔

شہباز شریف نے کہا کہ اس سلسلے میں ہم نے یہ منظم جدوجہد کی اور آج کابینہ کے سامنے یہ معاملہ آئے گا، جس کی منظوری کے بعد صدر مملکت اس کا آرڈیننس جاری کریں گے۔