انوپم کھیر نے ابتدا میں منموہن سنگھ کا کردار کیوں مسترد کیا تھا؟

فلم ’’دی ایکسیڈنٹل پرائم منسٹر‘‘ میں ڈاکٹر منموہن سنگھ کا کردار ادا کرنے والے انوپم کھیر نے اپنے انسٹاگرام اکاؤنٹ پر سابق وزیراعظم کو دلی خراج عقیدت پیش کیا ہے۔

انوپم کھیر نے اس بات کا بھی انکشاف کیا کہ انہوں نے ابتدائی طور پر ’’دی ایکسیڈینٹل پرائم منسٹر‘‘ میں وزیراعظم منموہن سنگھ کے کردار کو مسترد کردیا تھا۔

سینئر اداکار نے ایک طویل ویڈیو پیغام شیئر کیا ہے جس میں ڈاکٹر منموہن سنگھ کے بارے میں اپنے خیالات کا اظہار کیا گیا ہے۔ انھوں نے یہ بھی بتایا ہے کہ انھوں نے کس طرح اس کردار کےلیے خود کو تیار کیا۔ انوپم نے من موہن سنگھ کو ’’نرم دل، روشن خیال، شاندار اور مہربان‘‘ قرار دیا۔

ویڈیو میں انہوں نے کہا ہے کہ ’’میں ان سے دو بار تقریبات میں ملا۔ انہوں نے ہمیشہ میرے کام کی تعریف کی۔ وہ ایک ایماندار آدمی، عظیم رہنما، اور شاندار انسان تھے۔‘‘

انوپم کھیر نے اس بات کا بھی انکشاف کیا کہ انہوں نے ابتدائی طور پر ’’مختلف‘‘ وجوہات (بشمول سیاسی وجوہات) کی وجہ سے ’’دی ایکسیڈنٹل پرائم منسٹر‘‘ کو مسترد کردیا تھا۔ لیکن پھر انھوں نے فلم میں کام کرنے کے بعد کے تاثرات بتاتے ہوئے کہا کہ انھوں نے محسوس کیا یہ ان فلموں میں سے ایک ہے جہاں انھوں نے ’’سچائی‘‘ کا کردار ادا کیا ہے۔

بھارت کے سابق وزیراعظم منموہن سنگھ کی موت پر تمام خطوں اور زبانوں کے فلمی ستاروں نے دکھ کا اظہار کیا ہے۔ چرنجیوی، مادھوری ڈکشٹ، سنی دیول، مدھر بھنڈارکر، منوج باجپائی اور دیگر نے انھیں خراج تحسین پیش کیا ہے۔

ڈاکٹر منموہن سنگھ کے پسماندگان میں ان کی اہلیہ اور تین بیٹیاں ہیں۔ وہ 2004 سے 2014 تک ہندوستان کے وزیراعظم رہے۔ ان کی موت پر بھارتی حکومت نے سات روزہ سرکاری سوگ کا اعلان کیا ہے۔ سابق وزیراعظم کی نماز جنازہ کل 28 دسمبر کو ادا کی جائے گی۔