حیدرآباد، چوری کی دو بڑی وارداتوں میں ملوث دو ملزمان گرفتار

سخی پیر پولیس نے چوری کی دو بڑی وارداتوں میں ملوث دو ملزمان کو گرفتار کرلیا ہے۔ پولیس نے بتایا کہ ملزمان کے قبضے سے لاکھوں روپے نقدی، قیمتی طلائی زیورات اور انعامی بانڈز برآمد ہوئے ہیں۔

پولیس کے مطابق گرفتار ملزمان کی شناخت رضوان قریشی اور شہریار راجپوت کے نام سے ہوئی ہے، ان پر الزام ہے کہ انہوں نے 13 دسمبر کو سبزی کے تاجر عمران کے گھر میں چوری کی تھی۔

دونوں ملزمان نے گھر کے تالے توڑ کر 2 لاکھ روپے نقدی، کئی لاکھ روپے مالیت کے طلائی زیورات اور انعامی بانڈز چوری کر لیے تھے۔ اس کے بعد، 15 دسمبر کو ملزمان نے موبائل شاپ کے مالک شہریار راجپوت کے فلیٹ سے 30 لاکھ روپے نقدی اور 8 لاکھ روپے کے طلائی زیورات چوری کر لیے۔

پولیس تحقیقات کے مطابق ملزم شہریار راجپوت، موبائل شاپ کے مالک کا رشتہ دار ہے اور اس کا موبائل شاپ مالک کے ساتھ قریبی تعلق تھا۔ وہ ان کے تایازاد بھائی کا بیٹا ہے اور اکثر ان کے گھر آنا جانا رہتا تھا، جس کی وجہ سے وہ ان کے گھر کے اندرونی حالات سے واقف تھا۔

پولیس کا کہنا ہے کہ دوسرا گرفتار ملزم رضوان قریشی خود کو ڈپٹی میئر صغیر قریشی کا بھانجا بتا رہا ہے۔

پولیس نے دونوں ملزمان کو حراست میں لے کر مزید تفتیش کا آغاز کر دیا ہے۔