پاکستان-جنوبی افریقا میچ کے ساتھ ہی ٹیسٹ چمپیئن شپ کی فائنل ٹیم کی تصدیق

جنوبی افریقہ نے پاکستان کو تین میچوں کی ٹیسٹ سیریز کے پہلے میچ میں دو وکٹوں سے شکست دے کر لارڈز میں شیڈول ورلڈ ٹیسٹ چمپیئن شپ کے فائنل میں پہلی دفعہ جگہ بنالی۔

جنوبی افریقہ نے سنچورین ٹیسٹ میں بیٹنگ اور بولنگ میں پاکستانی ٹیم پر اپنی برتری ثابت کرتے ہوئے سیریز کے پہلے میچ میں دو وکٹوں سے کامیابی حاصل کی اور تین میچوں کی سیریز میں بھی 0-1 سے برتری حاصل کرلی۔

جنوبی افریقہ کو آئی سی سی ورلڈ ٹیسٹ چمپیئن شپ (ڈبلیو ٹی سی) 2025 کے فائنل تک رسائی کے لیے ایک جیت درکار تھی جو پہلے ٹیسٹ میں مشکلات کا شکار ہونے کے باوجود سنبھلتے ہوئے حاصل کی۔

ہوم گراؤنڈ میں سری لنکا کو 0-2 سے شکست دے کر جنوبی افریقہ کی ٹیم پہلے ہی ٹیسٹ چمپیئن شپ کی فہرست میں پہلے نمبر پر موجود تھی، مجموعی طور پر 11 میچوں میں جنوبی افریقہ نے 66.67 کی اوسط سے 7 میچوں میں فتح سمیٹی ہے۔

ٹیسٹ چمپیئن شپ کے میچوں میں جنوبی افریقہ کو شروع میں بھارت کے خلاف سریز برابر ہونے اور نیوزی لینڈ کے ہاتھ کلین سوئپ شکست کے بعد ویسٹ انڈیز اور بنگلہ دیش کے خلاف ٹیسٹ سیریز میں زبردست واپسی کی اور اس کے بعد ہوم گراؤنڈ میں کھیلی گئیں سیریز میں مزید فتوحات اپنے نام کیں۔

جنوبی افریقہ نے آسٹریلیا، بھارت اور سری لنکا جیسی حریف ٹیموں کو چت کرکے فائنل میں جگہ بنائی ہے جبکہ مذکورہ تینوں ٹیمیں چمپیئن شپ کے مقابلے میں موجود ہیں لیکن پروٹیز رواں برس ٹیسٹ چمپیئن شپ کے فائنل میں جگہ بنانے والی پہلی ٹیم بن گئی ہے۔

ورلڈ ٹیسٹ چمپیئن شپ کے فائنل کے لیے دوسری ٹیم کے لیے ابھی دیگر سرفہرست ٹیموں کو سر دھڑ کی بازی لگانی ہوگی تاہم آسٹریلیا کو بھارت پر معمولی برتری حاصل ہے جبکہ نیوزی لینڈ اور سری لنکا بھی ان کے قریب ہیں۔