کراچی:
شان مسعود پھر ٹیم کی غلطیوں کا رونا رونے لگے، جنوبی افریقہ کے ہاتھوں پہلے ٹیسٹ میں شکست کے بعد کپتان کہتے ہیں کہ ہم بدستور ایک ہی جیسی غلطیاں دہرا رہے ہیں، ہمیں تھوڑی اور محنت سے میچ کو اپنے حق میں فنش کرنا ہوگا۔
تفصیلات کے مطابق سنچورین میں کھیلے گئے پہلے ٹیسٹ میچ میں پاکستان ٹیم کو بھرپور فائٹ کے باوجود 2 وکٹ سے شکست کا منہ دیکھنا پڑا، جس کے بعد کپتان شان مسعود نے ایک بار پھر ٹیم کی غلطیوں کا رونا رونا شروع کردیا ہے۔
وہ کہتے ہیں کہ ہم بدستور ایک ہی جیسی غلطیاں دہرا رہے ہیں، ہمیں ان پر قابو پانے کی ضرورت ہے، میچ کے دوران ایسے لمحات آئے جس میں اضافی کوشش کی ضرورت تھی۔
مزید پڑھیں: جنوبی افریقا نے دلچسپ مقابلے کے بعد پاکستان کو سنچورین ٹیسٹ میں شکست دیدی
ہمیں میچز کو اپنے حق میں فنش کرنے کی ضرورت ہے، ہمیں بیٹنگ اور بولنگ دونوں میں زیادہ محنت کی ضرورت ہے، محمد عباس نے دوسری اننگز میں جس طرح کی بولنگ کی اسی کی ہمیں ضرورت ہے، سعود شکیل نے عمدہ پرفارم کیا، اگر وہ مزید بیٹرز کے ساتھ بیٹنگ کرتے تو اپنی سنچری بھی مکمل کرلیتے۔
اس طرح کی پرفارمنسز آپ کو میچز جتواتی ہیں مگر بدقسمتی سے ہم یہ لائن عبور نہیں کرپائے۔ شان مسعود کا کہنا تھا کہ جنوبی افریقہ سے پہلے ٹیسٹ میں بہرحال ہمیں اپنی کوشش پر فخر ہے لیکن ہمیں مزید بہتر کھیل پیش کرنا ہوگا۔
مزید پڑھیں: پاکستان-جنوبی افریقہ میچ کے ساتھ ہی ٹیسٹ چمپیئن شپ کی فائنل ٹیم کی تصدیق
ہم ان کنڈیشنز میں اچھا پرفارم کررہے ہیں، ہمیں پہلی اننگز میں اپنا اسکور بہتر بنانا چاہیے تھا، پہلا گھنٹہ بہت چیلنجنگ تھا، میں اپنی وکٹ گنوا بیٹھا اور پھر 3 وکٹیں جلد ہی گرگئیں، کامران غلام اور رضوان یکے بعد دیگر آؤٹ ہوئے اور پھر اسی طرح عامر جمال اور سلمان آغا بھی وکٹ گنوا بیٹھے۔
ہم نے 2 مرتبہ ان کی 8 وکٹیں اڑائیں مگر جو دباؤ بڑھایا اس کو برقرار رکھنا چاہیے تھا، ہمیں اپنی ان غلطیوں پر قابو پاتے ہوئے آگے بڑھنے کی ضرورت ہے۔
دوسری جانب جنوبی افریقی کپتان ٹیمبا باووما کا کہنا تھا کہ یہ میرے لیے انتہائی جذباتی لمحہ ہے، یہ میچ ٹیسٹ کرکٹ کی بہترین تشہیر اور پوری ٹیم اس کامیابی پر خوش ہے۔