شلپا شیٹھی کی فٹنس اور سدابہار جوانی کا راز کیا ہے؟

بھارتی اداکارہ شلپا شیٹھی زندگی کی 49 بہاریں دیکھنے کے باوجود آج بھی جوان نظر آتی ہیں۔ اداکارہ نے ایک انٹرویو میں اپنی فٹنس کے راز سے پردہ اٹھایا ہے۔

شلپا شیٹھی کی سدا بہار جوانی اور خوبصورتی کا راز یوگا، سخت ورزش کے معمولات اور صحت مند کھانوں میں پوشیدہ ہے، اور وہ ان معمولات پر برسوں سے عمل کررہی ہیں۔

49 سالہ بالی ووڈ اداکارہ نے ایک انٹرویو میں بتایا کہ وہ کیسے اپنی پسندیدہ ورزش سے لے کر روزانہ کی خوراک تک میں  اپنی صحت کو برقرار رکھنے کےلیے کیا کچھ کرتی ہیں۔

اداکارہ نے اعتراف کیا کہ وہ کھانے کی شوقین ہیں لیکن ہمیشہ صحت مند کھانے کو ترجیح دیتی ہیں۔ اپنی بھرپور ڈائٹ کا خیال رکھتے ہوئے ہفتے میں ایک دن ایسا رکھتی ہیں جب وہ کوئی بھی چیز کھا سکتی ہیں جیسے کیک، قلفی، اور گلاب جامن وغیرہ، لیکن باقی دنوں میں وہ صحت مند اور متوازن غذا کے اصول پر عمل کرتی ہیں۔

شلپا نے بتایا ان کے دن کی ابتدا ایلوویرا کے جوس سے ہوتی ہے، جو مدافعتی نظام اور جلد کےلیے بھی بہترین ہے۔ اس کے بعد دلیا اور چائے کا استعمال کرتی ہیں۔ شلپا سفید چینی سے حتی الامکان بچتی ہیں اور صرف براؤن شوگر ہی استعمال کرتی ہیں۔ اداکارہ نے مشورہ دیا کہ ہر سفید چیز کو براؤن سے بدل دیں، چاہے وہ براؤن بریڈ ہو، براؤن رائس ہو یا براؤن شوگر۔

اداکارہ کی روزمرہ کی خوراک متوازن اور غذائیت سے بھرپور ہوتی ہے اور اس میں بہت سادہ کھانے شامل ہیں۔ انھوں نے بتایا کہ وہ بھاپ میں بنا ہوا یا ابلا ہوا کھانا نہیں کھاتیں بلکہ عام کھانا ہی کھاتی ہیں لیکن اسے صحت مند سبزیوں کے تیل یا زیتون کے تیل میں پکاتی ہیں۔

شلپا نے اپنی متوازن غذا کے بارے میں بتاتے ہوئے کہا کہ دوپہر کے کھانے میں دال چاول چپاتی، چکن کری، اور کوئی ایک سبزی کھاتی ہین۔ اگر شام کو بھوک لگے تو براؤن ٹوسٹ کے ساتھ دو انڈے اور چائے اور رات کے کھانے میں کوشش کرتی ہیں کہ جلدی کھانا کھائیں۔

انہوں نے یہ بھی بتایا کہ میں سلاد، سوپ اور ایک چکن کی ڈش کھاتی ہوں۔ میری غذا بہت سادہ ہے اور اس پر عمل کرنا آسان ہے۔