دنیا کا سب سے بڑا یوٹیوبر قانونی شکنجے میں پھنس گیا

اونٹاریو لیبر منسٹری نے بیسٹ گیمز کے پروڈکشن سیٹ پر پیش آنے والے ایک حادثے کی تحقیقات شروع کر دی ہے جو مشہور یوٹیوبر جمی "مسٹر بیسٹ" کی قیادت میں بننے والی ایک ایمیزون پرائم سیریز میں پیش آیا ہے۔

رپورٹس کے مطابق، حادثہ 11 ستمبر 2024 کو ٹورانٹو کے ایک فلمی مقام پر پیش آیا جہاں ایک بڑا لکڑی کا ٹکڑا ایک منی ایچر گاؤں میں بنے ٹاور سے گر گیا۔ اس حادثے میں ایک عملے کے رکن زخمی ہو گئے، جو تاحال اسپتال میں زیر علاج ہیں۔

منسٹری نے پروڈکشن ہاؤسز بلنک 49 اسٹوڈیوز اور مین ہیٹن بیچ اسٹوڈیوز کو کچھ ہدایات جاری کی ہیں۔ تاہم، تحقیقات مکمل ہونے تک تفصیلات جاری نہیں کی جا رہیں۔

اس سے قبل بھی بیسٹ گیمز کی پروڈکشن میں حفاظتی اقدامات کے حوالے سے خدشات ظاہر کیے گئے تھے۔ رولنگ اسٹون کے ایک مضمون میں ایسے الزامات سامنے آئے تھے، اور یوٹیوبر روزانا پانسینو نے مزید انکشافات کا اشارہ دیا تھا۔

مسٹر بیسٹ نے دسمبر 2024 کی ایک ویڈیو میں ان الزامات کی تردید کی تھی، جہاں انہوں نے کہا تھا کہ سیٹ پر کسی کے بھی ہڈی ٹوٹنے یا خاموشی خریدنے کی خبریں بے بنیاد ہیں۔

فی الحال، مسٹر بیسٹ نے اس نئی تحقیقات پر کوئی تبصرہ نہیں کیا ہے، لیکن یہ حادثہ سیریز کی پروڈکشن پر مزید سوالات اٹھا رہا ہے۔