نیوزی لینڈ کے سابق ٹیسٹ کھلاڑی اور پاکستان کے سابق ہیڈ کوچ گرانٹ بریڈبرن کو انگلش کاؤنٹی گلیمورگن نے ہیڈ کوچ کے عہدے سے فارغ کر دیا۔
58 سالہ گرانٹ بریڈ برن کو نامناسب رویے کی شکایات کے بعد کلب نے ریگولیٹرز کی جانب ریفر کیا تھا۔ کلب کی جاری کردہ پریس ریلیز میں بتایا گیا کہ وہ پُر اعتماد ہیں کہ اس معاملے میں تمام تقاضوں کو منصفانہ اور شفاف طریقے سے پورا کیا گیا ہے۔
کلب نے مزید بتایا کہ گلیمورگن کسی قسم کے امتیازی رویے کو کسی صورت برداشت نہیں کرتا۔
اندرونی تحقیقات مکمل کرنے کے بعد گلیمورگن کا کہنا تھا کہ یہ واضح ہے کہ بریڈبرن کی پوزیشن کمزور ہے اور کلب اب متاثرین کا ازالہ کر رہا ہے۔
کلب کے چیئر مارک رائڈرک-رابرٹس کا کہنا تھا کہ گلیمورگن میں ہم اپنے لوگوں کی فلاح پہلے رکھتے ہیں اور متاثر کو سہارا فراہم کرتے ہیں۔
واضح رہے بریڈ برن نے رواں برس جنوری میں پاکستان کے ہیڈ کوچ کا عہدہ چھوڑنے کے بعد گلیمورگن کے ساتھ تین سال کا معاہدہ کیا تھا۔