کراچی:
شہر قائد کے علاقے لانڈھی شیرپاؤ کالونی کے رہائشی دوست نے دوست کو فائرنگ کر کے قتل کر دیا اور موقع سے فرار ہوگیا۔
تفصیلات کے مطابق قائدآباد کے علاقے لانڈھی شیرپاؤ کالونی میں فائرنگ سے ایک شخص جاں بحق ہوگیا ، مقتول کی لاش چھیپا ایمبولینس کے ذریعے جناح اسپتال منتقل کیا گیا۔
ایس ایچ او قائدآباد انسپکٹر فراصت نے بتایا کہ مقتول کی شناخت 40 سالہ جان محمد ولد فیروز خان کے نام سے کی گئی ، مقتول شیرپاؤ کالونی کا رہائشی اور بے روزگار تھا اور آبائی تعلق ضلع بٹگرام سے تھا۔
انہوں نے بتایا کہ مقتول کا اپنے گاؤں کے ہی ایک شخص قدوس جو مقتول کا دوست تھا اس سے کوئی پرانی دشمنی تھی حالانکہ دو روز قبل دونوں نے شادی کی ایک تقریب میں ایک ساتھ بیٹھ کر کھانا کھایا تھا۔
واقعے کے وقت بھی دونوں گھر کے قریب بیٹھے ہوئے تھے جس پر دونوں میں پرانی بات پر تلخ کلامی ہوئی جس میں ملزم قدوس نے جان محمد کو فائرنگ کر کے ہلاک کر دیا اور موقع سے فرار ہوگیا ، پولیس نے قتل میں ملوث ملزم کی تلاش شروع کر دی ہے۔